काठमाडौं। देशका विभिन्न जिल्लासहित काठमाडौं उपत्यकामा खाना पकाउने एलपी ग्यासको अभाव देखिएको छ। ग्यास नपाएपछि उपभोक्ता डिलर र सप्लायरका अगाडि खाली सिलिन्डर लाइनमा राख्न बाध्य भएका छन् भने एउटा सिलिन्डर साट्न पनि हप्तौँ कुर्नुपर्ने अवस्था बनेको छ।

ग्यास विक्रेता महासंघ र उद्योगीहरूका अनुसार ग्यास आयातमा कमी नभई ७.१ किलोको आधा ग्यासबाट पुनः १४.२ किलोको पूर्ण ग्यास वितरण सुरु भएपछि एकैचोटि माग बढेकाले समस्या देखिएको हो। धेरै उपभोक्ताले आवश्यकताभन्दा बढी सिलिन्डर भर्न र घरमा स्टक राख्न थालेपछि बजारमा चाप बढेको उनीहरूको भनाइ छ।

नेपाल आयल निगमले भने ग्यास अभाव देशव्यापी नभएको दाबी गर्दै काठमाडौं, दाङ र सुर्खेतका केही क्षेत्रमा मात्रै बढी चाप रहेको जनाएको छ। निगमले दैनिक ग्यास आपूर्ति बढाइएको र उद्योगीलाई थप परिमाण बजारमा पठाउन निर्देशन दिइएको जनाएको छ।

उद्योगी र विक्रेताले उपभोक्तालाई अनावश्यक रूपमा ग्यास भण्डारण नगर्न तथा अत्यावश्यक परेमा मात्रै ग्यास खरिद गर्न आग्रह गरेका छन्। उनीहरूका अनुसार बजारको अवस्था सामान्य हुन अझ केही समय लाग्न सक्छ।

लाेक कल्याणकारी