एजेन्सी। क्रिष्टियन एरिक्सन मैदानमै ढलेपछि डेनमार्क र युक्रेन बीचको खेल स्थगित भएकोछ । गएराती भएको डेनमार्क र युक्रेन बीचको अन्तर्राष्ट्रिय मैत्रीपूर्ण खेलका क्रममा डेनिस मिडफिल्डर क्रिष्टियन एरिक्सन अचानक मैदानमा ढलेपछि खेल पूर्ण रूपमा स्थगित गरिएको छ। घरेलु मैदानमा भएको खेलको ६५औं मिनेटमा ३४ वर्षीय एरिक्सन आफ्नो छाती समात्दै मैदानमा ढलेका थिए। त्यति बेला डेनमार्क २–१ गोलले अगाडि रहेको थियो । मेडिकल टोलीले उनलाई तत्कालै मैदानमा प्राथमिक उपचार गरेको थियो भने दुवै टोलीका खेलाडीहरूले उनलाई घेरेर सुरक्षात्मक घेरा बनाएका थिए। घटनालगत्तै डेनिस फुटबल एशोसिएशनले एरिक्सन होसमै रहेको जानकारी दिएको छ।

राष्ट्रिय टोलीका डाक्टर मोर्टेन बोएसेनका अनुसार इरिक्सनको अवस्था अहिले सामान्य छ र उनी आफैं हिँडेर मैदानबाहिर आएका छन्। उनको शरीरमा जडान गरिएको पेसमेकरले सही रूपमा काम गरेको र उनी केही बेर बेहोस भए पनि चाँडै होसमा आएका थिए। यो घटना के कारणले भयो भन्ने कुरा पत्ता लगाउन अहिले अस्पतालमा उनको थप स्वास्थ्य परीक्षण भइरहेको छ। सन् २०२० को युरो कपमा समेत उनी मैदानमै ढलेका थिए । त्यतिबेला फिनल्याण्ड विरुद्धको खेलमा हृदयघात भएपछि एरिक्सनको शरीरमा ‘इम्प्लान्टेबल कार्डियोभर्टर डिफिब्रिलेटर’ नामक उपकरण जडान गरिएको थियो। अहिले भने अस्पतालबाटै एरिक्सनले सबै खेलाडीहरूलाई आफू ठीक रहेको सन्देश पठाएका छन्।

लाेक कल्याणकारी