प्रनिश गिरी,पर्वत । पर्वतको सदरमुकाम कुश्मा बजार क्षेत्रमा सामुदायिक कुकुरहरु यत्रतत्र डुल्दा सडक दुर्घटनाको खतरा देखिएपछि न्युनिकरणका लागि बन्ध्याकरण कार्यक्रम गरिएको छ । जिल्लाको भेटरिनरी अस्पताल तथा पशु सेवा कार्यालयले तीन दिनको समय लिएर
कुश्मा बजारसहित आसपासका क्षेत्रका कुकुरहरुको स्थायी बन्ध्याकरण गरेको हो । अस्पतालका अनुसार जिल्लामा सामुदायिक तथा घरपालुवा गरी १ सय ८९ वटा कुकुरहरुलाई स्थायी बन्ध्याकरण गरिएको छ ।

भेटेरिनरी अस्पताल कुश्मामा १ सय २३ वटा र बाँकीको जलजला गाउँपालिकास्थित पशु कार्यालयमा पुगेर स्थायी बन्ध्याकरण गरिएको थियो । भेटेरिनरी अस्पतालका डाक्टर ऋसभ गुरागाईका अनुसार सामुदायिक  कुकुरको बढ्दो संख्यालाई कम गरी रेविज रोग नियन्त्रण र सडक दुर्घटना न्युनिकरण गर्न बन्ध्याकरण आवश्यक परेको हो ।

पशु चिकित्सक गुरागाईले बजार क्षेत्रमा सामुदायिक कुकुरको संख्या वृद्धि हुनुको कारणबारे चिन्ता व्यक्त गर्दै भन्नुभयो–सामुदायिक कुकुरहरुको संख्या वृद्धि हुनुमा घर पालुवा कुकुरलाई मालिकले केही वर्ष पाल्ने र पछि पाल्न कठिन मानेर सडकमाछोडिदिने गरेको पाइयो । जापानीज स्पीच जातका साना आकारका कुकुरहरु समेत सडकमा देखिन्छन् । गाउँघरतिरबाट बजार क्षेत्रमा फालिएको फोहोर खानेकुरा खान पाइनुको कारण बजार आउने गर्दछन् । जिल्लाको जलजला गाउँपालिकामा जापानीज स्पीच जातिका साना कुकुरहरु धेरै संख्यामा खुल्ला डुल्दै गरेको पाइएको डाक्टर गुरागाईको भनाई छ ।

घरपालुवा जापानीज स्पीच जातिका कुकुरलाई बजारबाट खरीद गर्नका लागि ५ देखि १० हजार रुपैयाँसम्म खर्च गर्नुपर्ने हुन्छ । सामुदायिक कुकुरहरु बजार क्षेत्रका सडक र हाइवे क्षेत्रमा डुल्दा सडक दुर्घटनाको जोखिम भएको स्थानीयबासीको गुनासो छ । सामुदायिक कतिपय कुकुरहरुले गुडिरहेको मोटरसाइकललाई भुक्दै पिछा गर्दा सवारीचालक आत्तिने र दुर्घना भएका छन् ।

सामुदायिक कुकुरको संख्या वृद्धि हुँदा प्रर्याप्त खानेकुरा नपाउने र कुकुरहरु खानेकुराका लागि आपसमा झगडा गर्दा घाइते भएर दुःख पाउने गरेको स्थानीय पशु अधिकारकर्मी राजकुमारी राना बताउनु हुन्छ । बन्ध्याकरणले कुकुरमा आक्रमक स्वभाव घटेर जाने हुदा पनि आपसमा झगडा गर्ने र मानिसलाई टोक्ने हुँदैन । भेटेरिनरी अस्पतालको गत वर्षको तथ्यांक अनुसार जिल्लामा सामुदायिक र घरपालुवा गरी
कुकुरको संख्या २ हजार १ सय ३९ रहेको छ ।

लाेक कल्याणकारी