पर्वत । कुस्मा नगरपालिका ४ निवासी समाजसेवी श्रीमती सुस्मा पूनज्यूले आफ्नो जन्मदिनको सुखद अवसरलाई सामाजिक सेवासँग जोड्दै फलेवास राहले प्रहरी चौकीका लागि २ इन १ प्रिन्टरसहित फोटोकपी मेसिन सहयोग गर्नुभएको छ।

मुडीकुवा र देवीस्थान क्षेत्रका सेवाग्राहीले प्रहरी चौकीमा प्रिन्टर तथा फोटोकपी मेसिनको अभावका कारण भोग्दै आएको असुविधालाई महसुस गर्दै उहाँले वडा कार्यालयको समन्वयमा उक्त सामग्री प्रहरी चौकी इन्चार्ज उत्तम उर्माजा पूनज्युलाई हस्तान्तरण गर्नुभएको हो। यस सहयोगले प्रहरी सेवा प्रवाहलाई थप प्रभावकारी र सेवाग्राहीमैत्री बनाउन महत्वपूर्ण टेवा पुग्ने विश्वास लिइएको छ।

वडा अध्यक्ष तथा नगर प्रवक्ता अच्युत तिवारीको अध्यक्षतामा सम्पन्न कार्यक्रममा विभिन्न राजनीतिक दलका प्रतिनिधि, समाजसेवी, पूर्व वडा अध्यक्ष, जनप्रतिनिधि, कर्मचारी तथा स्थानीयवासीहरूको उल्लेखनीय सहभागिता रहेको थियो।

यस अवसरमा समाजप्रति देखाउनुभएको अनुकरणीय योगदानको उच्च सम्मान गर्दै वडा परिवारका तर्फबाट समाजसेवी सुस्मा पूनज्यूलाई दोसल्ला, माला, खादा तथा मायाको चिनो प्रदान गरी सम्मान गरिएको थियो।

साथै, फलेवास नगरपालिका वडा नं. ४ मा सरुवा भई आउनुभएकी वडा सचिव सरस्वती आचार्यज्यू तथा प्राविधिक मिलन रिजालज्यूलाई स्वागत गर्दै सफल कार्यकालको शुभकामना व्यक्त गरिएको थियो।

लाेक कल्याणकारी