पर्वत।पर्वतको प्रसिद्ध धार्मिक तथा पर्यटकीय स्थल गुप्तेश्वर गुफामा नयाँ कार्यसमिति गठन भएसँगै संरक्षण, व्यवस्थापन र पर्यटन प्रवर्द्धनका गतिविधि तीव्र बनेका छन्।

हालै सम्पन्न अधिवेशनबाट सन्तु गिरीको अध्यक्षतामा नयाँ कार्यसमिति चयन भएपछि गुफा परिसरको नियमित सरसफाइ, सौन्दर्यीकरण, सुरक्षा व्यवस्थापन तथा आगन्तुकका लागि आवश्यक सेवासुविधा विस्तारका काम अघि बढाइएको छ।

नयाँ नेतृत्वले गुफाको मौलिकता जोगाउँदै धार्मिक तथा पर्यटकीय आकर्षण बढाउने उद्देश्यका साथ अल्पकालीन तथा दीर्घकालीन योजना कार्यान्वयनमा ल्याएको जनाएको छ। अध्यक्ष सन्तु गिरीका अनुसार प्रकाश व्यवस्था, सूचना सामग्री, पूर्वाधार विकास तथा धार्मिक–सांस्कृतिक कार्यक्रमलाई प्राथमिकता दिइनेछ।

पवित्र साउन महिनाको अवसरमा श्री गुप्तेश्वर महादेवको विशेष पूजा, जलाभिषेक, रुद्राभिषेक तथा दर्शन कार्यक्रमसमेत आयोजना गरिने भएको छ।

गुफा परिसरको सरसफाइ र सौन्दर्यीकरणमा लायन्स क्लब अफ पर्वत मोदीकाली, लायन्स क्लब अफ पर्वत कुश्मा सिटी तथा अन्य सामाजिक संस्थाहरूको सक्रिय सहयोग रहेको छ।

स्थानीयवासीले नयाँ नेतृत्वबाट गुप्तेश्वर गुफाको संरक्षण, व्यवस्थित सञ्चालन र पर्यटकमैत्री वातावरण निर्माणमा उल्लेखनीय उपलब्धि हासिल हुने अपेक्षा गरेका छन्। सात तले गुप्तेश्वर गुफा पर्वत जिल्लाको प्रमुख धार्मिक तथा पर्यटकीय गन्तव्यका रूपमा परिचित छ।

लाेक कल्याणकारी