पर्वत । पर्वतको मोदी गाउँपालिकाले चालु आर्थिक वर्ष २०८२/०८३ मा सम्पादन गरेका सेवा प्रवाह, विकास निर्माण, नीति तथा बजेट कार्यान्वयनबारे नागरिकसँग प्रत्यक्ष छलफल गर्न सार्वजनिक सुनुवाइ कार्यक्रम आयोजना गर्ने भएको छ।

गाउँपालिकाले जारी गरेको सूचनाअनुसार असार ३२ गते (बिहीबार) बिहान ११ बजे मोदी सभाहल, पातिचौरमा सार्वजनिक सुनुवाइ कार्यक्रम आयोजना गरिनेछ। कार्यक्रममार्फत गाउँपालिकाको कामकारबाहीबारे नागरिकबाट सुझाव, गुनासा, प्रतिक्रिया र जिज्ञासा संकलन गरिने जनाइएको छ।

गाउँपालिका अध्यक्ष हिरादेवी शर्माले सार्वजनिक सुनुवाइले स्थानीय सरकारलाई थप जवाफदेही, पारदर्शी र नागरिकमैत्री बनाउन महत्वपूर्ण भूमिका खेल्ने बताइन्। उनले विकास निर्माण, सेवा प्रवाह तथा बजेट कार्यान्वयनका विषयमा नागरिकले खुलेर आफ्नो धारणा राख्न आग्रह गर्दै कार्यक्रमलाई सफल बनाउन सबै सरोकारवालाको सक्रिय सहभागिता आवश्यक रहेको उल्लेख गरिन्।

गाउँपालिकाले राजनीतिक दलका प्रतिनिधि, निर्माण व्यवसायी, उपभोक्ता समिति, विद्यालयका प्रधानाध्यापक, विद्यालय व्यवस्थापन समिति, टोल विकास संस्था, विकास साझेदार, नागरिक समाज, सञ्चारकर्मी, महिला, युवा, विद्यार्थी, कृषक, उद्यमी, व्यवसायी, दलित, आदिवासी जनजाति, अपांगता भएका व्यक्ति, ज्येष्ठ नागरिक, जनप्रतिनिधिलगायत सबै सरोकारवालालाई कार्यक्रममा अनिवार्य उपस्थितिका लागि अनुरोध गरेको छ।

सार्वजनिक सुनुवाइ स्थानीय सरकारको पारदर्शिता र सुशासनको महत्वपूर्ण माध्यम मानिन्छ। यसबाट नागरिकले प्रत्यक्ष रूपमा स्थानीय सरकारसँग प्रश्न राख्ने, सुझाव दिने तथा सेवा प्रवाहमा रहेका समस्या औँल्याउने अवसर पाउने भएकाले स्थानीय शासनलाई अझ प्रभावकारी, उत्तरदायी र जनमुखी बनाउन सहयोग पुग्ने अपेक्षा गाउँपालिकाको छ।

लाेक कल्याणकारी