पर्वत ।  सरकारी विज्ञापन सरकारी सञ्चारमाध्यममा मात्र प्रकाशन तथा प्रसारण गर्ने नेपाल सरकारको निर्णयको विरोधमा नेपाल पत्रकार महासंघ पर्वत शाखाले जिल्ला प्रशासन कार्यालय पर्वतमा धर्ना कार्यक्रम आयोजना गरेको छ।

निर्णयले निजी सञ्चारमाध्यमको अस्तित्व, प्रेस स्वतन्त्रता तथा सञ्चार क्षेत्रको आर्थिक स्थायित्वमा नकारात्मक असर पर्ने भन्दै महासंघले विरोध कार्यक्रम गरेको हो। धर्ना कार्यक्रममा जिल्लामा क्रियाशील पत्रकार तथा सञ्चारकर्मीहरूको उल्लेख्य सहभागिता रहेको थियो।

कार्यक्रमका सहभागीहरूले सरकारी विज्ञापन वितरणमा विभेदकारी नीति अवलम्बन गरिएको भन्दै निर्णय तत्काल फिर्ता लिन सरकारसँग माग गरेका छन्। उनीहरूले निजी सञ्चारमाध्यमलाई उपेक्षा गर्ने कुनै पनि निर्णय लोकतान्त्रिक मूल्य र प्रेस स्वतन्त्रताको भावना विपरीत हुने बताएका छन्।

धर्नापछि पत्रकार महासंघ पर्वत शाखाको नेतृत्वमा जिल्लामा क्रियाशील सञ्चारकर्मीहरूको हस्ताक्षर संकलन गरी विरोधपत्र जिल्ला प्रशासन कार्यालय पर्वतमार्फत नेपाल सरकारलाई बुझाइएको छ। ज्ञापनपत्रमा सरकारी विज्ञापन वितरणमा समान अवसरको व्यवस्था गर्न तथा निजी सञ्चारमाध्यमको अधिकार सुनिश्चित गर्न माग गरिएको छ।

महासंघले प्रेस तथा अभिव्यक्ति स्वतन्त्रतामाथि असर पर्ने निर्णय नसच्याइए थप आन्दोलनका कार्यक्रम घोषणा गर्न बाध्य हुने चेतावनी समेत दिएको छ।

जिल्ला प्रशासन कार्यालयले पत्रकारहरूको माग र हस्ताक्षरसहितको ज्ञापनपत्र सम्बन्धित निकायसम्म पुर्‍याउने प्रतिबद्धता जनाएको छ।

लाेक कल्याणकारी