​बुटवल,। बुटवलको मुख्य व्यापारिक केन्द्र अमरपथस्थित ‘तिनाउ सुनचाँदी पसल’मा भएको भनिएको करोडौँको चोरी घटना पसल सञ्चालककै योजना र मिलेमतोमा भएको सनसनीपूर्ण खुलासा भएको छ। बिमा रकम दाबी गर्ने उद्देश्यले पसल सञ्चालक र कामदार मिलेर चोरीको नाटक गरेको प्रहरी अनुसन्धानबाट खुलेको हो।
​

यही जेठ १७ गते राति पसलबाट १ करोड ४६ लाख ९४ हजार रुपैयाँ बराबरको सुनचाँदीका गरगहनाहरू चोरी भएको भन्दै सञ्चालक दीपक विकले इलाका प्रहरी कार्यालय बुटवलमा उजुरी दिएका थिए।

​यसरी खुल्यो रहस्य
​एउटै पसलबाट यति ठूलो परिमाणमा गहना चोरी भएपछि प्रहरीले यसलाई गम्भीरताका साथ लिएको थियो। घटनाको अनुसन्धानका लागि इलाका प्रहरी कार्यालय बुटवल, संघीय प्रहरी कार्यालय भैरहवा, प्रदेश प्रहरी कार्यालय र जिल्ला प्रहरी कार्यालय रुपन्देहीको संयुक्त टोली परिचालन गरिएको थियो।

​अनुसन्धानका क्रममा घटनास्थलको प्रकृतिका साथै सञ्चालक र कामदारको गतिविधिको सुक्ष्म अध्ययन गर्दा प्रहरीलाई शंका लागेको थियो। लगातारको प्राविधिक अनुसन्धान र सोधपुछका क्रममा बाहिरका चोर नभई स्वयम् पसल सञ्चालक दीपक विक र उनका कामदारको मिलेमतोमा चोरीको नाटक रचिएको तथ्य फेला परेको हो।

​बिमा रकम कुम्ल्याउने दाउ
​प्रहरीका अनुसार पसलको ठूलो रकम बिमा गरिएको र सोही बिमा बापतको रकम भुक्तानी (Claim) लिनका लागि यो प्रपञ्च रचिएको थियो। सञ्चालक विकले आफ्नै पसलका बहुमूल्य गरगहना सुरक्षित स्थानमा लुकाएर चोरी भएको भन्दै प्रहरी र बिमा कम्पनीलाई ढाँटेका थिए।
​

प्रहरीले घटनामा संलग्न सञ्चालक विकसहित कामदारलाई नियन्त्रणमा लिएको छ भने लुकाएर राखिएका गरगहना समेत बरामद गरिसकेको छ। पक्राउ परेकाहरूमाथि ठगी तथा आपराधिक षड्यन्त्र सम्बन्धी कसुरमा थप अनुसन्धान अगाडि बढाइएको इलाका प्रहरी कार्यालय बुटवलले जनाएको छ।

लाेक कल्याणकारी