पर्वत ।पर्वत समाज दक्षिण कोरिया र कोरिया–मल्लाज सम्पर्क मञ्च दक्षिण कोरियाले आर्थिक सहयोग हस्तान्तरण कार्यक्रम गरेको छ।

सुपादेउराली दर्शन गरी फर्किने क्रममा अर्घाखाँचीमा भएको बस दुर्घटनामा गम्भीर घाइते भएकी पवित्रा जीसीको उपचारमा सहयोग पुगोस् भन्ने उद्देश्यले दक्षिण कोरियामा रहेका पर्वतवासीहरूले ६५ हजार रुपैयाँ जम्मा गरेका थिए। उक्त रकम पवित्रा जीसीको परिवारलाई हस्तान्तरण गरिएको हो।

कुश्मा नगरपालिका–४ का वडा सदस्य सन्तोष कार्कीको उपस्थितिमा  पवित्रा जीसीको परिवारलाई रकम हस्तान्तरण गरिएको थियो। कार्यक्रमको सहजीकरण कोरिया रिटर्नी पर्वत समाजका पूर्व सल्लाहकार जनक क्षेत्रीले गरेका थिए।

कार्यक्रममा मल्लाजबाट नवीन जीसी, पूर्ण बरुवाल, कुश्माबाट अर्जुन पौडेल, निर्जन, दीपक रखाल, पर्वत समाज दक्षिण कोरियाका महासचिव जीवन पौडेल र कोरिया रिटर्नी कृष्ण जीसी सहभागी थिए।

वडा सदस्य सन्तोष कार्कीले पर्वत समाज दक्षिण कोरिया र मल्लाज–कोरिया सम्पर्क मञ्चप्रति आभार व्यक्त गरे। उनले यस्ता मानवीय कार्यलाई निरन्तरता दिन आग्रह गर्दै सबैप्रति धन्यवाद ज्ञापन गरे।

पवित्रा जीसीको स्वास्थ्यलाभको कामना गर्दै कार्यक्रम सम्पन्न भएको आयोजकले जनाएको छ।

लाेक कल्याणकारी