पर्वत । एशियाकै ठूलो शिलाका रूपमा परिचित महाशिला गाउँपालिका–५ स्थित महाशिलामा नेपाल पत्रकार महासंघ पर्वत शाखाको १४औँ साधारण सभा सम्पन्न भएको छ। महाशिलालाई राष्ट्रिय तथा अन्तर्राष्ट्रिय स्तरमा चिनाउने उद्देश्यसहित ऐतिहासिक तथा पर्यटकीय स्थलमै साधारण सभा आयोजना गरिएको हो।

साधारण सभाको अवसरमा पत्रकारिता क्षेत्रमा योगदान पुर्‍याएका तीन जना पत्रकारलाई ‘सिर्जनशील पत्रकारिता पुरस्कार’ प्रदान गरिएको छ। पुरस्कारबाट नेपाल पत्रकार महासंघका केन्द्रीय सदस्य छविलाल तिवारी, प्रेस चौतारीका केन्द्रीय सदस्य गणेश गिरी तथा गोरखापत्र दैनिकका संवाददाता प्रनिश गिरी सम्मानित हुनुभएको हो। उहाँहरूलाई नगद १२ हजार २२२ रुपैयाँ, दोसल्ला तथा प्रमाणपत्रसहित सम्मान गरिएको थियो।

त्यसैगरी पत्रकारिता तथा प्रेस स्वतन्त्रताको क्षेत्रमा पुर्‍याएको योगदानको कदर गर्दै महासंघ पर्वतका संस्थापक अध्यक्ष भोलानाथ शर्मा तथा पूर्व अध्यक्षहरू ओमप्रसाद शर्मा, यामबहादुर केसी, दुर्गाप्रसाद शर्मा, छविलाल तिवारी र सन्तोष थापालाई सम्मान गरिएको थियो।

कार्यक्रमलाई सम्बोधन गर्दै यशोदा रिमालले गण्डकी प्रदेशको समृद्धिको प्रमुख आधार पर्यटन रहेको बताउनुभयो। उहाँले सम्भावना बोकेर पनि ओझेलमा परेका पर्यटकीय गन्तव्यहरूको पहिचान र प्रवर्द्धनमा स्थानीय सरकारहरूले विशेष ध्यान दिनुपर्नेमा जोड दिनुभयो। साथै, संघीय सरकारले सरकारी विज्ञापन कटौती गरे पनि गण्डकी प्रदेश सरकार सञ्चार क्षेत्र र पत्रकारहरूको पक्षमा रहेको उहाँको भनाइ थियो।

कार्यक्रममा मित्रलाल बस्याल, रमेश पौडेल, विष्णुराम विक, इश्वरी भुसाल, राजु पौडेल, हरिओम शर्मा लामिछाने, ठाकुर वि पौडेल तथा हरिकृष्ण गौतम लगायतले शुभकामना मन्तव्य व्यक्त गर्नुभएको थियो।

नेपाल पत्रकार महासंघ पर्वतका अध्यक्ष लक्ष्मण सापकोटाको अध्यक्षतामा सम्पन्न कार्यक्रमको स्वागत उपाध्यक्ष रञ्जना खत्री र सञ्चालन सचिव साजन परियारले गर्नुभएको थियो।

महाशिलामा आयोजित पत्रकारहरूको भ्रमण तथा साधारण सभाले यस क्षेत्रको पर्यटन प्रवर्द्धन र प्रचार–प्रसारमा महत्वपूर्ण योगदान पुग्ने अपेक्षा गरिएको छ।

लाेक कल्याणकारी