कुश्मा । अन्तर्राष्ट्रिय पर्वत समाज को पाँचौं महाधिवेशन यही फागुन २३ गते कुश्मास्थित बन्दना होटलमा आयोजना हुने भएको छ। महाधिवेशनको पूर्वसन्ध्यामा आयोजित पत्रकार सम्मेलनमा कार्यक्रम संयोजक मुना भुसालले तयारी अन्तिम चरणमा पुगेको जानकारी दिनुभयो।

संयोजक भुसालका अनुसार देश तथा विदेशबाट प्रतिनिधिहरूको सहभागिता रहनेछ। “महाधिवेशनलाई व्यवस्थित, सभ्य र उपलब्धिमूलक बनाउन आवश्यक सम्पूर्ण तयारी पूरा भएको छ,” उहाँले भन्नुभयो, “यसपटकको अधिवेशनले संगठनलाई अझ सशक्त र प्रभावकारी बनाउने विश्वास लिएका छौं।”

समाजका अध्यक्ष गुणराज शर्मा (गुराँस)ले संस्थाको मुख्य उद्देश्य ‘माटोसँग जोडिने अभियान’ भएको उल्लेख गर्दै आगामी दिनमा व्यवसायिकरणमार्फत रोजगारी सिर्जना गर्ने लक्ष्य लिएको बताउनुभयो। “प्रवासी पर्वतेलीहरूलाई लगानी र सीपसहित जिल्लाको विकासमा

जोड्दै आर्थिक समृद्धि हासिल गर्नु हाम्रो दीर्घकालीन योजना हो,” उहाँले स्पष्ट पार्नुभयो। संस्थापक अध्यक्ष पुरन गिरीले समाज स्थापना गर्दाको उद्देश्य स्मरण गर्दै एकताबद्ध प्रयासबाट मात्र जिल्लाको दिगो विकास सम्भव हुने धारणा राख्नुभयो। “हामीले सुरु गरेको अभियान आज अन्तर्राष्ट्रिय स्तरसम्म पुगेको छ, अब यसलाई उत्पादनशील र परिणाममुखी बनाउनु आवश्यक छ,” उहाँले बताउनुभयो।

यसैगरी गैरआवासीय नेपाली संघ (NRNA) का अध्यक्ष कुल आचार्यले प्रवासी नेपालीहरूको लगानी, अनुभव र नेटवर्कलाई जिल्लाको आर्थिक विकासमा उपयोग गर्नुपर्नेमा जोड दिनुभयो। “रोजगारी सिर्जना र उद्यमशीलता प्रवर्द्धनमार्फत युवालाई स्वदेशमै अवसर दिनु अहिलेको आवश्यकता हो,” उहाँको भनाइ थियो।

महाधिवेशनमा नयाँ नेतृत्व चयनसँगै आगामी कार्ययोजना, लगानीमैत्री कार्यक्रम तथा स्थानीयस्तरमा व्यवसायिक वातावरण निर्माण गर्ने विषयमा समेत छलफल हुने जनाइएको छ। आयोजकले सम्पूर्ण सदस्य तथा सरोकारवालालाई सक्रिय सहभागिताका लागि आह्वान गरेका छन्।

लाेक कल्याणकारी