काठमाडौं । संस्कृति, पर्यटन तथा नागरिक उड्डयनमन्त्री सुदन किराती बिहानबिहानै रिसाएका छन् ।
आइतबार बिहान सामाजिक सञ्जालमा पोस्ट भएको उनको स्टाटसले उनी निकै आक्रोशित अवस्थामा रहेको सहजै बुझ्न सकिन्छ । आफूले घुस नखाँदा र नखुवाउँदा पापीहरू बहुलाउन लागेको भन्दै उनले आक्रोश व्यक्त गरेका छन् ।
उनले आफूले घुस लिएको प्रमाणित गर्न चुनौती पनि दिएका छन् । केही सञ्चारमाध्यम र सामाजिक सञ्जालमा मन्त्री किरातीले ‘पशुपति क्षेत्र विकासको कोषको जमिनको विषयमा भूमाफियासँग साँठगाँठ गरेको’ सामग्री प्रकाशित भएपछि उनले यस्तो चेतावनी दिएका हुन् ।
किरातीले आफूले कसैसँग घुस लिएको प्रमाणित गरे एक मिनेट पनि पदमा नबस्ने उल्लेख गरेका छन् । उनले आफूले घुस नलिँदा र लिन नदिँदा आफ्नोबारे कुप्रचार भइरहेको पनि दाबी गरेका छन् ।
‘मैले घुस नखाँदा र नखुवाउँदा पापीहरू बौलाउन थाले, आखिरी म मर्दा पाँच सयको कात्रो र पाँच फिट जमिन चाहिएला । प्रमाणित गर म एक मिनेट बस्दिनँ,’ मन्त्री किरातीले फेसबुकमा लेखेका छन् ।
पशुपति विकास कोषको ३१ रोपनी जमिन पहिले नै व्यक्तिका नाममा पारेर किरातीले हालसाविक गर्न खोजेको भन्दै समाचार आइरहेका छन् ।
पूर्वपर्यटनमन्त्री प्रेम आलेले विकास कोषको ३१ रोपनी जग्गा व्यक्तिको नाममा पार्ने प्रयास भइरहेको संसदमै बोलिसकेका छन् ।
त्यसमा किराती र पशुपति क्षेत्र विकास समितिका पदाधिकारीको पनि संलग्नता रहेको बताइन्छ ।
