काठमाडौं, ।

नेकपा (एमाले) का प्रभावशाली नेता तथा पूर्वमन्त्री महेश बस्नेतले रास्वपाका सभापति रवि लामिछानेले सरकारमा सहभागी हुनको लागि प्रधानमन्त्री पुष्पकमल दाहालसँग छलफल गरेको र आफ्नो पार्टीका अध्यक्ष केपी शर्मा ओलीसँग पनि राति १० बजेसम्म छलफल गरेको खुलासा गरेका छन् ।

उनले रास्वपाले चुनाव जितेको कुरा आफूहरुले स्विकारेको र अझै धेरै चुनाव जिते अझै ठूलो हैसियत बन्ने भन्दै त्यसको लागि पनि शुभकामना दिए । आज राति प्राइम टिभीबाट प्रसारण भएको जनता जान्न चाहन्छन् कार्यक्रममा पत्रकार ऋषि धमलासँग कुरा गर्दै उनले यस्तो बताएका हुन् ।

उनले रास्वपा सभापति लामिछानेलाई उठाएका विषय ईमानदारितापूर्वक कार्यान्वयन गर्न लागिपर्न सुझाव दिए । उनले भने,” बाहिर बाहिर एउटा विषय उठाउने अनि भित्रभित्र अर्को साँठगाँठ गर्ने काम नगरेको राम्रो । अस्ति प्रचण्डज्यूकोमा बसेर उहाँले कुन कुन मन्त्रालय माग्नुभयो भन्ने कुरा बाहिर आएकै छ । हिजोपनि राति १० बजेसम्म पनि बालकोटमा केपी ओलीज्यूकै, कोठामै उहाँलाई हामीले देखेकै हो । उहाँले भेटेको कुरा बाहिर आउँदैन् ।

प्रचण्ड र हाम्रो अध्यक्ष भेटेको कुरा बाहिर आउँछ । उहाँका समथर्कहरुले केपी ओली र प्रचण्ड भेटेको कुरालाई फेसबुकमा रोइलो गर्छन्, उहाँको सभापति चाहीँ हिजो बेलुका ११ बजेसम्म केपी ओलीकै कोठामा छन् भन्ने कुरा उनीहरुले थाहा पाउँदैनन् । सूचना चाहीँ आंशिक ढंगले मात्रै सम्प्रेषण गरिएको छ ।”

बस्नेतले एमालेले भ्रष्टाचारको मामिलामा कसैसँग सम्झौता नगर्ने बताए । उनले अहिलेको नक्कली भुटानी शरणार्थी प्रकरणमा पनि जो कोही व्यक्ति संलग्न भएको प्रमाणित भए आफ्नो पार्टीले कसैलाई नबचाउने दाबी गरे । उनले राजनीतिक आग्रहको साथ फसाउन खोजिएको हो यसमा उचित छानबिन हुनुपर्ने बताए ।

लाेक कल्याणकारी