पर्वत,। प्रेस सेन्टर नेपालको १९ औं स्थापना दिवस प्रेस सेन्टर नेपाल पर्वत शाखाले एक कार्यक्रमकाविच मनाएको छ । १९ औं स्थापना दिवसका अवसरमा प्रेस सेन्टरले देशैभर विविध कार्यक्रम गरिरहेको सन्दर्भमा पर्वत शाखाले पनि शुभकामना आदान–प्रदान तथा दिगो पत्रकारिता विषयक अन्तरक्रिया कार्यक्रम गरि मनाएको हो ।

प्रेस सेन्टर नेपालको कुस्मा स्थित कार्यालयमा भएको कार्यक्रममा प्रेस सेन्टर नेपालको आन्दोलन र जनपक्षीय पत्रकारितासँगै समाज रुपान्तरणमा लागेर सहादत भएका महान सहिद कृष्णसेन इच्छुक लगायत भर्खरै यती एयरको प्लेन दुर्घटनामा दिवंगत भएका संगठनका केन्द्रिय उपाध्यक्ष त्रिभुवन पौडेल र प्रेस सेन्टरका अर्का सदस्य तथा पत्रकार अनिल शाहिप्रति श्रद्धाञ्जली व्यक्त गरिएको थियो ।

कार्यक्रमको उद्घाटन स्वर्गिय पत्रकार त्रिभुवन पौडेलको तस्बीरमा पुष्पगुच्छा अर्पण गरी फलेवास नगरपालिकाका उप–प्रमुख तथा कार्यक्रमका प्रमुख अतिथी शोभाकुमारी क्षेत्रीले गर्नुभएको थियो । कार्यक्रममा बोल्दै क्षेत्रीले जनपक्षिय पत्रकारितामा लागेर सहादत प्राप्त गर्ने महान पत्रकारहरुलाई श्रद्धाञ्जली व्यक्त गर्दै दिगो र व्यवसायिक पत्रकारिताका लागि थपिएका चुनौतीहरुको सामना गर्न पत्रकारहरु चनाखो रहनुपर्ने बताउनुभयो ।

उहाँले प्रेस सेन्टर र पत्रकारहरुको हकहितका लागि आफु सदैव कटिबद्द रहेको भन्दै मिल्ने र सक्ने ठाउँमा सदैव सक्दो सहयोग गर्ने बताउनुभयो । त्यस्तै कार्यक्रममा बोल्दै विशिष्ट अथिति तथा नेकपा माओवादी केन्द्रका कुश्मा नगरपालिका अध्यक्ष शंकर गिरीले पत्रकारहरुको आस्था आफ्नो ठाउँमा रहने भएता पनि सूचना प्रवाहका सवालमा पत्रकारहरु स्वतन्त्र र निष्पक्ष रहन सके व्यवसायिक पत्रकारिताको गरिमा अझै बढ्न सक्ने बताउनुभयो ।

कार्यक्रममा नेकपा माओवादी केन्द्रका प्रदेश कमिटि सदस्य लोकराज आचार्य सौगातले जनपक्षिय पत्रकारिताको क्षेत्रमा प्रेस सेन्टर नेपालको भूमिका अतुलनिय रहेको बताउनुभयो । समापन कार्यक्रमा बोल्दै कार्यक्रमका अध्यक्ष तथा प्रेस सेन्टर नेपाल पर्वतका अध्यक्ष निर्मल पौडेलले संगठन स्थापना दिवसका अवसरमा सबैमा शुभकामना व्यक्त गर्नुभयो । पौडेलले युद्धको रणभूमिबाट जन्मिएको जनपक्षीय र क्रान्तिकारी पत्रकारहरुको संस्था प्रेस सेन्टर नेपालले देशमा युद्धकाल हुँदै संघीयतासम्म आइपुग्दा ठूला–ठूला परिवर्तनहरुमा महत्वपुर्ण भूमिका खेलेको स्मरण गराउनुभयो ।

संगठनसंगै व्यवसायिक र श्रमजिवि पत्रकारहरुको हकहितका लागि सदैव लागिपर्ने भन्दै पौडेलले जनताको परिवर्तन र समाज रुपान्तरणमा प्रेससेन्टर नेपालले सदैव कलम चालिरहने र आउने दिनमा संगठनको इतिहासलाई बचाई राख्न निरन्तर लागि परिरहनेमा जोड दिनुभयो । प्रेस सेन्टर नेपाल पर्वतका अध्यक्ष निर्मल पौडेलको अध्यक्षतामा सम्पन्न भएको कार्यक्रममा स्वागत मन्तव्य संगठनका पुर्वअध्यक्ष राजबाबु पिसि र सञ्चालन संगठनका कोषाध्यक्ष राम्जी आचार्यले गर्नुभएको थियो ।कार्यक्रममा नेकपा माओवादी केन्द्र कुस्मा नगर कमिटी उपाध्यक्ष मिनराज केसी अविरल ,सचिव भिम बहादुर नेपाली लगायत नेता कार्यकर्ता हरुको उपस्थिती रहेको थियो ।

लाेक कल्याणकारी