गोबिन्द, पर्बत । कुश्मा स्पोर्टस क्लबको आयोजनामा पर्वतमा गण्डकी प्रदेश स्तरीय सेभेन ए साइड फुटबल प्रतियोगिता आयोजना भोलि बाट शुरु हुनेछ । भोली बाट शुरु हुने प्रदेश स्तरीय सेभेन ए साइड फूटबलको सम्पूर्ण तयारी भएको आयोजक क्लबका अध्यक्ष बिक्रम श्रेष्ठले जानकारी गराउनु भयो । प्रतियोगिता भोली चैत २२ देखि २६ गतेसम्म संचालन हुनेछ ।
खेल क्षेत्रलाई चलायमान बनाउन र खेलाडीहरूलाई पनि जागरूक बनाउन प्रतियोगिताको आयोजना गरिएको क्लबका सल्हाकार साथै पूर्व खेलाडी राजन गरुंगले हामीलाई बताउनु भयो । पर्वतमा रहेको खेल मैदानमा २०५८ सालमा सशस्त्र प्रहरी बलको गण राखिएपछि खेल मैदानको अभावमा रहेकोमा हालै मात्रै व्यवस्थित मैदान बनाएपछि प्रतियोगिताको आयोजना गरिएको हो । अहिले खेलमैदान वरीपरी जाली र अगाडी सुन्दर गेट पनि निमार्ण भएको छ।
प्रदेशका सबै जिल्लाबाट कम्तीमा पनि एक टिम सहभागी गर्ने तयारी गरिएको उक्त प्रतियोगिता नक आउटको आधारमा खेलाइने छ भने कम्तीमा पनि २० समूहले प्रतिस्पर्धा गर्न सक्ने आयोजकले हाम्रो सूचनाकेन्द्र डटकम लाई जानकारी गराउनु भयो । समूह दर्ताका लागि आठ हजार रुपैयाँ तोकिएको सो प्रतियोगिताको विजेताले एक लाख ५० हजार र उपविजेताले ७५ हजार रुपैयाँ पाउने अध्यक्ष बिक्रम श्रेष्ठले जानकारी गराउनु भयो ।
