पर्वत, ।
कोभिड १९ को तेश्रो लहरबाट पर्वत अस्पतालमा कार्यरत ४ जना चिकित्सक सहित १६ जना स्वास्थ्यकर्मीमा संक्रमण पुष्टि भएको छ । अस्पतालमा कार्यरत स्वास्थ्यकर्मीमा संक्रमण देखिए सँगै अस्पतालले शुक्रबार एक सूचना जारी गरी आकस्मिक सेवा र फिवर क्लिनिक बाहेक सवै सेवा बन्द हुने जानकारी दिएको छ ।
पर्वत अस्पतालका निमित्त सुपरिटेण्डेण्ट डिबी क्षेत्रीका अनुसार अस्पतालमा जनशक्ति अभाव सँगै निसंक्रमित गर्नका लागि माघ ९ गतेदेखि माघ १४ गतेसम्म अस्पतालका सेवा बन्द गरिएको हो । माघ ८ गते शनिबार आकस्मिक बाहेकका सेवा नहुनेभएपछि १० गते आइतबार देखि १४ गते सम्म सेवा बन्द गर्ने निणर्य गरिएको डाक्टर क्षेत्रीले बताउनुभयो ।
पर्वत अस्पतालले अहिले दैनिक रुपमा एन्टिजेन परीक्षण गरिरहेको छ । यसरी गरिएका परीक्षण मध्ये ७२ देखि ८० प्रतिशत सम्म दैनिक संक्रमण देखिएको डाक्टर क्षेत्रीले जानकारी दिनुभयो । तेश्रो भेरियन्टबाट पर्वतमा १ सय ८ जना सक्रमित भइसकेका छन् ।
