काठमाडौं । नेपाली कांग्रेसका सभापति तथा प्रधानमन्त्री शेरबहादुर देउवाले कोरोना महामारीको तेस्रो लहर नेपालमा छिट्टै सुरु हुने लक्षण देखिन थालेका बताएका छन् ।

स्वास्थ्य तथा जनसंख्या मन्त्रालयले शनिबारदेखि सुरू गरेको ‘नेपाल मास्क अभियान’ अन्तर्गत भिडियो सन्देश जारी गर्दै प्रधानमन्त्री देउवाले सबैको साझा प्रयासले मात्र कोरोनाभाइरस संक्रमण रोकथाम तथा नियन्त्रण गर्न सकिने बताए ।

‘सरकारको एक्लो प्रयासले मात्र कोरोनाभाइरस संक्रमण रोकथाम तथा नियन्त्रण गर्न सम्भव नभएकाले यसमा सबैको सहयोग हुनुपर्छ,’ उनले भने ।

प्रधानमन्त्री देउवाले कोरोना भाइरस महामारीको तेस्रो लहर छिट्टै सुरू हुने लक्षण देखिएकाले सबै सजग र सचेत हुनुपर्ने बताएका छन् । देउवाले भीडभाड हुने कार्यक्रम नगर्न र स्वास्थ्य सुरक्षा मापदण्ड पालना गर्न सम्पूर्ण राजनीतिक दल, गैरसरकारी संस्था, निजी क्षेत्रलाई आग्रह समेत गरेका छन् ।

प्रधानमन्त्री देउवाले अत्यन्त आवश्यक परेको बेला मात्र बाहिर निस्कन र निस्कनुअघि नाक, मुख राम्रोसँग छोप्ने गरी मास्क लगाउन सबैमा आग्रह गर्दै भौतिक दूरी कायम गर्न, बेलाबेलामा साबनुपानीले हात धुन र स्वास्थ्यसम्बन्धी मापदण्ड पालना गर्न सबैलाई आग्रह गरेका छन् ।

देउवाले महामारी नियन्त्रण गर्ने प्रभावकारी उपाय खोप रहेको र विभिन्न उमेर समूहलाई खोप लगाउने कार्य सरकारले जारी राखेको बताउँदै खोप लगाउँदा दूरी कायम गरी लाइनमा बस्न समेत आग्रह गरेका छन् ।

लाेक कल्याणकारी