नयाँदिल्ली । आतंकवादी संगठन जैस ए मोहम्मदले भारतमा ठूलो आतंकवादी हमलाका लागि गरिरहेको योजना सार्वजनिक भएको छ । प्रधानमन्त्री नरेन्द्र मोदी, गृहमन्त्री अमित शाह र राष्ट्रिय सुरक्षा सल्लाहकार अजित डोभालमाथि नै आक्रमण गर्ने योजनाका साथ जैशले आतंकवादी हमलाको तयारी गरिरहेको थियो ।

ब्यूरो अफ सिभिल एभियसनले जैसको एक कागजात फेला पारेको भारतीय मिडियाहरुले उल्लेख गरेका छन् । सो कागजातमा जम्मू–कश्मीरको विशेषाधिकार अन्त्य गर्ने भारतीय कदमको बदला लिने उल्लेख छ । जैशले भारतका जम्मू, पठानकोट, अमृतसर, जयपुर, गांधीनगर, कानपुर, लखनऊलगायत ३० वटा ठूला सहरहरुमा आतंकवादी हमला गर्ने योजना बनाएको खुलेको छ । साथै चारवटा विमानस्थलहरुमा पनि हमला गर्ने तयारीमा जैश रहेको सो कागजातबाट खुलेको छ ।

जैशले नै गत फेब्रुअरी १४ का दिन जम्मू–कश्मीरको पुलवामास्थित श्रीनगर हाईवेमा आत्मघाती विस्फोट गराई ४० भन्दा बढी भारतीय प्रहरीको हत्या गरेको थियो । पाकिस्तान आश्रित यो संगठनका नाइके मसुद अजहरलाई संयुक्त राष्ट्रसंघीय सुरक्षा परिषदले केहि महिनाअघि अन्तर्राष्ट्रिय आतंकवादीको सूचीमा राखेको छ । भारतले कश्मीरको विशेषाधिकार अन्त्य गरेपछि पाकिस्तान र त्यहाँका भारतविरोधी आतंकवादी संगठनहरुले युद्ध र आक्रमणको धम्की दिईरहेका छन् ।नेपाल पानाबाट

लाेक कल्याणकारी