पर्वत । संविधान दिवस २०८३ को अवसरमा पर्वतमा विभिन्न कार्यक्रम आयोजना गरी दिवस मनाइएको छ। संविधान दिवसलाई उल्लासमय बनाउन विभिन्न सामाजिक तथा जनमुखी गतिविधि सञ्चालन गरिएको हो।

दिवसको अवसरमा  नेपाल पत्रकार महासंघ पर्वतको आयोजनामा रक्तदान कार्यक्रम सम्पन्न भएको छ। भोटेकोशी बाढीपीडितदेखि प्रदेश अस्पताल पर्वतमा उपचाररत बिरामीसम्म आवश्यक रगत सहज रूपमा उपलब्ध गराउने उद्देश्यले रक्तदान कार्यक्रम आयोजना गरिएको हो। कार्यक्रममा  १९ पिन्ट रगत संकलन भएको नेपाल पत्रकार महासंघ पर्वतका सचिव साजन परियारले जानकारी दिनुभयो।

उहाँका अनुसार रक्तदान कार्यक्रममा जिल्लामा सक्रिय सञ्चारकर्मी, नेपाली सेना, सशस्त्र प्रहरी बल र नेपाल प्रहरीलगायतको सहभागिता रहेको थियो। नेपाल रेडक्रस सोसाइटी पर्वतको प्राविधिक सहयोगमा सम्पन्न कार्यक्रममा बोल्दै प्रमुख जिल्ला अधिकारी **गंगाबहादुर क्षेत्रीले लामो बलिदान र परिवर्तनपछि प्राप्त संविधानको रक्षा तथा सफल कार्यान्वयन गर्नु नेपाली जनताको दायित्व भएको बताउनुभयो।

उहाँले संविधानको सफल कार्यान्वयनबाट मात्रै जनताका इच्छा–आकांक्षा पूरा हुनुका साथै मुलुकको समृद्धि सम्भव हुने बताउनुभयो। पवित्र दिनमा सामाजिक तथा पुण्य कार्य गरेकोमा उहाँले नेपाल पत्रकार महासंघ पर्वतलाई धन्यवादसमेत दिनुभयो।

रक्तदान कार्यक्रममा सहभागी सबैलाई प्रमाणपत्रसमेत प्रदान गरिएको थियो। नेपाल पत्रकार महासंघ पर्वतका अध्यक्ष लक्ष्मण सापकोटाको अध्यक्षतामा सम्पन्न कार्यक्रमको स्वागत उपाध्यक्ष रञ्जना खत्री र सञ्चालन सचिव साजन परियारले गर्नुभएको थियो।

यसैगरी, जिल्ला मूल समारोह समितिको आयोजनामा पर्वत कारागारमा रहेका कैदीबन्दीको स्वास्थ्य परीक्षण गरिएको छ। प्रदेश अस्पताल पर्वत र प्रदेश जनस्वास्थ्य कार्यालयको समन्वयमा कैदीबन्दीको स्वास्थ्य अवस्था जाँच गरी रोग पहिचान तथा निदान गर्ने उद्देश्यले स्वास्थ्य परीक्षण गरिएको हो।

संविधान दिवसकै अवसरमा  पर्वत अस्पतालमा उपचाररत १५ जना बिरामीलाई फलफूल वितरण गरिएको छ। अस्पतालमा भर्ना भएर उपचाररत बिरामीलाई फलफूल वितरण गरिएको मूल संयोजक  विष्णुराम विकले जानकारी दिनुभयो।

यसैगरी संविधान दिवसको अवसरमा आज साँझ लोकतान्त्रिक चोकमा दीप प्रज्ज्वलन कार्यक्रम आयोजना हुने जनाइएको छ।

लाेक कल्याणकारी