एजेन्सी। भारतले तेस्रोपल्ट टी–२० विश्वकपको उपाधि जित्दै इतिहास रचेको छ। अहमदाबादमा  आइतबार सम्पन्न फाइनलमा न्युजिल्यान्डलाई जसप्रित बुमराहको कसिलो बलिङसँगै ९६ रनले पराजित गर्दै आइसिसी पुरुष टि‌ ट्वान्टी विश्वकप २०२६ को उपाधि जितेको छ । टस जितेर न्युजिल्याण्डले फिल्डिङ रोजेको थियो। भारतले पहिले ब्याटिङ गर्दै २० ओभरमा ५ विकेट गुमाएर २‌ सय ५५ रन बनायो । जुन टि ट्वान्टी विश्वकप फाइनल इतिहासकै सबैभन्दा ठूलो स्कोर हो। जवाफमा न्युजिल्यान्ड १९ ओभरमा १ सय ५९ रनमै अलआउट भयो। योसँगै भारत सबैभन्दा बढीपल्ट विश्वकप जित्ने पहिलो टोली बनेको छ। अहिलेसम्म यसअघि भारतसँगै इङ्ल्यान्ड र वेस्ट इन्डिजले समान दुईपल्ट विश्वकप जितेका थिए। यसअघि भारतले २००७ र २०२४ मा विश्वकप जितेको थियो। इङ्ल्यान्डले २०१० र २०२२ तथा वेस्ट इन्डिजले २०१२ र २०१६ मा विश्वकप जितेका थिए।

न्युजिल्यान्डका ओपनर टिम सिफर्टले सर्वाधिक ५२ रन बनाए। २६ बल खेलेका उनले २ चौका र ५ छक्का प्रहार गरे। मिचेल स्यान्टनरले ४३ रनको योगदान दिए। अन्य ब्याटरले भने राम्रो प्रदर्शन गर्न नसक्दा भारत लगातार उपाधि जित्न सफल रह्यो। भारतलाई जित दिलाउन पेसर बलर जसप्रित बुमराह निर्णायक बने। उनले ३.५ ओभरमा मात्र १५ रन दिएर ४ विकेट लिए। अक्षर पटेलले ३ विकेट थपे। हार्दिक पाण्ड्या, अभिषेक शर्मा र वरुण चक्रवर्तीले समान एक विकेट लिए।

लाेक कल्याणकारी