पर्वत । लायन्स क्लब इन्टरनेशनल डिस्ट्रिक्ट ३२५ के अन्तर्गत लायन्स क्लब अफ पर्वत मोदिकालीको आयोजनामा कुश्मा नगरपालिका–३ दुर्लुङ्गमा एकदिने वृहत निःशुल्क स्वास्थ्य शिविर सफलतापूर्वक सम्पन्न भएको छ ।

स्थानीय समुदायको स्वास्थ्य सचेतना अभिवृद्धि र सेवा प्रवाहलाई प्राथमिकता दिँदै आयोजना गरिएको शिविरबाट २९६ जना सेवाग्राही लाभान्वित भएका छन् । शिविरमा सहभागी सर्वसाधारणको सामान्य स्वास्थ्य परीक्षण गर्नुका साथै आवश्यक निःशुल्क औषधि वितरण गरिएको छ । शिविरका क्रममा १३२ जनाको मधुमेह (सुगर) परीक्षण तथा ४२ जनाको ईसीजी परीक्षण गरिएको आयोजकले जनाएको छ । ग्रामीण भेगका नागरिकलाई विशेषज्ञ सेवा नजिकैबाट उपलब्ध गराउने उद्देश्यले शिविर सञ्चालन गरिएको हो ।

शिविरमा धौलागिरी प्रदेश अस्पतालका कन्सल्टेन्ट चिकित्सक डा. शेषकान्त लामिछाने र प्रदेश अस्पताल पर्वतका मेडिकल सुपरिन्टेन्डेन्ट डा. ढुन्डीराज पौडेलको सक्रिय सहभागिता रहेको थियो । चिकित्सक टोलीले स्वास्थ्य परामर्श, रोग पहिचान तथा आवश्यक उपचारबारे परामर्श प्रदान गरेका थिए । स्थानीय बासिन्दाले यस्तो सेवाले समय र खर्च दुवै बचत भएको भन्दै आयोजकप्रति आभार व्यक्त गरेका छन् ।
कार्यक्रमलाई सफल बनाउन डिष्ट्रिक्ट गभर्नर एम.जे.एफ दुर्गा प्रसाद हुमागाईंको विशेष उपस्थिति र मार्गदर्शन रहेको थियो । साथै विभिन्न लायन लिडरहरू, औषधि उत्पादन कम्पनीहरू, कुश्मा नगरपालिका–३ का वडाध्यक्ष, तथा कार्यक्रमको समन्वय र उपकरण सहयोग गर्ने पर्वत मेडिकल हलको महत्वपूर्ण योगदान रहेको आयोजक लायन्स क्लब अफ पर्वत मोदिकालीका अध्यक्ष प्रकाश कर्माचार्यले बताए ।
लायन्स क्लब अफ पर्वत मोदिकालीका पदाधिकारीहरूले स्वास्थ्य सेवा पहुँचबाट टाढा रहेका समुदायलाई लक्षित गर्दै आगामी दिनमा पनि यस्ता सामाजिक तथा मानवीय कार्यक्रमलाई निरन्तरता दिने प्रतिबद्धता व्यक्त गरेका छन् ।

कार्यक्रममार्फत समुदायमा स्वास्थ्यप्रति सचेतना बढ्नुका साथै समयमै रोग पहिचान र उपचारमा सहयोग पुगेको बताइएको छ ।कार्यक्रम सफल बनाउन प्रत्यक्ष तथा अप्रत्यक्ष रूपमा सहयोग गर्ने सम्पूर्ण लायन मित्रहरू, स्वास्थ्यकर्मी, स्वयंसेवक, प्रायोजक संस्था तथा स्थानीय समुदायप्रति आयोजकले हार्दिक धन्यवाद ज्ञापन गरेको छ ।

साझेदारी

लाेक कल्याणकारी