पर्वत । “सीप र सम्भावना : नयाँ युगको सुरुवात” भन्ने नारा सहित साताव्यापी कार्यक्रमहरूको आयोजना गरिरहेको पर्वत जेसीजले मङ्गलवार आफ्नो चौथो दिनको कार्यक्रम सम्पन्न गरेको छ ।पहिलो दिनमा वक्तृता प्रतियोगिता, दोस्रो दिनमा लागू औषध दुव्र्यसनबिरुद्ध सचेतनामूलक कार्यक्रम र तेस्रो दिनमा मैत्रीपूर्ण फुटबल कार्यक्रमको आयोजना गरेको जेसीजले चौथो दिनमा विद्यालयमा विभिन्न सामग्री सहयोग तथा कम्प्युटर मर्मत गरेको हो । पर्वत सदरमुकाम कुश्मा बजारमा रहेको नारायण माध्यमिक विद्यालयमा पुगेर सूचना तथा प्रविधिसम्बन्धी विभिन्न सामग्रीहरू हस्तान्तरण गर्नुका साथै विद्यालयमा शिक्षण सिकाइका लागि प्रयोगमा रहेका कम्प्युटरहरूमा आवश्यक मर्मत गरिएको हो ।

विद्यालयमा गरिएको सहयोगप्रति खुसी व्यक्त गर्दै प्रमुख अतिथि कुश्मा नगरपालिका–८ चुवाका वडाध्यक्ष सुरेन्द्र के.सीले जेसीजका अभियानहरूलाई आफूले नजिकबाट हेरिरहेको बताए । सामाजिक सेवामा सक्रिय र नेतृत्व विकासका लागि व्यक्तिगत रूपमा आर्थिक व्यवस्थापन गरेर समाजका हरेक क्षेत्रमा गर्दै आएको सहयोगमा उनले खुसी व्यक्त गरे । विधिको शासन हुनुपर्छ भन्ने मान्यता बोकेको जेसीजभित्रको शासन पद्धति पनि सबैले सिको गर्न लायक रहेको वडाध्यक्ष के.सी.को भनाइ छ ।

कार्यक्रमका संयोजक पवन श्रेष्ठले सामाजिक कामहरूमा नै सक्रिय रहेको जेसीजले बालबालिकाहरूको अध्ययनमा सहयोग पुगोस् भन्ने उद्देश्यले विद्यालयमा सहयोग गरिएको बताए । जिल्लाभरमा नै सबैभन्दा धेरै विद्यार्थीहरू अध्ययनरत रहेको विद्यालयमा प्रयोगमा रहेका कम्प्युटर तथा उपकरणहरूमा समस्या पनि उत्तिकै मात्रामा आउने भएकाले उक्त विद्यालयमा सामग्री सहयोग र कम्प्युटर मर्मत गरिएको उनको भनाई छ ।

विद्यालयका प्रधानाध्यापक प्रकाश रिजालले पर्वत जेसीजले आफ्ना सामाजिक कामहरूको अभियानका क्रममा सामुदायिक विद्यालयलाई छनोट गरेकोमा संस्थाप्रति धन्यवाद ज्ञापन गरे । राज्यका तर्फबाट कम्प्युटर मर्मत वा आवश्यक उपकरणका लागि भनेर बजेट नआउने र कहिलेकाहीँ विद्युतीय सामग्रीहरूको मूल्य र मर्मत निकै महँगो हुँदा लगानी गर्न नसकिने अवस्था रहेकोमा राज्यले पनि ध्यान दिनुपर्ने उनको भनाई छ ।

पर्वत जेसीजका पूर्व राष्ट्रिय उपाध्यक्ष बसन्तकुमार कर्माचार्य, नारायण माध्यमिक विद्यालयका सहायक प्रधानाध्यापाक विनोद सुवेदी लगायतको उपस्थितिमा भएको कार्यक्रममा विद्यालयका शिक्षक तथा बिद्यार्थीहरुको पनि सहभागिता रहेको थियो । कार्यक्रमको सञ्चालन महासचिव प्रवेशराज पुरीले गरेका थिए पनि पर्वत जेसीजका अध्यक्ष अच्युत पौडेलको अध्यक्षतामा कार्यक्रम सम्पन्न भएको हो ।
पर्वत जेसीजले हरेक वर्ष झैँ यस वर्ष पनि साताव्यापी ‘जेसीज सप्ताह–२०२५’ मनाइरहेको छ । सामाजिक सेवा, नेतृत्व विकास तथा सीप अभिवृद्धिमै केन्द्रित कार्यक्रमहरू गर्दै आएको जेसीजले युवामुखी र प्रभावकारी गतिविधिहरू सञ्चालन गरिरहेको छ । बाँकी रहेका कार्यक्रमहरू अन्तर्गत मङ्सिर तीन गते जेसीज बोर्ड स्थापना कार्यक्रम, मङ्सिर चार गते स्लो बाइक रेस प्रतियोगिता र मङ्सिर पाँच गते लोकनृत्य प्रतियोगिता तथा जेसीज सङ्गम रहेका सप्ताहकी मूल संयोजक शर्मिला शर्माले बताइन् ।

लाेक कल्याणकारी