पर्वत । १९ औँ लोकतन्त्र दिवस पर्वतमा पनि विभिन्न कार्यक्रम गरी मनाईएको छ । नागरिक समाज सञ्जाल पर्वतको आयोजना, सामाजिक विकास कार्यालय पर्वतको सहयोग तथा गैसस महासंघ पर्वतको संयोजनमा प्रभातफेरी तथा अन्तरक्रिया कार्यक्रम गर्नुका साथै जनआन्दोलनका शहिद गोबिन्दनाथ शर्माको शालिकमा माल्यार्पण गरिएको हो ।

कार्यक्रममा बोल्दै बक्ताहरुले लामो जनयुद्ध र १९ दिने जनआन्दोलनको जगमा प्राप्त लोकतन्त्र अझैपनि संस्थागत हुन नसकेको बताएका छन् । लोकतन्त्र स्थापनापछि मुलुकमा थुपै खालका विकास र परिवर्तन आएको भएपनि नागरिकको अवस्था परिवर्तन हुन नसकेको उनिहरुको भनाई छ । मुलुकको विकासका निम्ति दलहरु गम्भिर नभएको, खाली सत्ता लिप्सा र स्वार्थकेन्द्रीत राजनीति गरेका कारण लोकतन्त्रको मर्म पुरा हुन नसकेको र आम नागरिले लोकतन्त्र र गणतन्त्रको प्रत्याभूति पाउन नसकेको बताएका छन् ।

कार्यक्रममा शहिद परिवारका सदस्य देव शर्मा पौडेलले लोकतन्त्र दिवसलाई राज्यले उपेक्षा गरेको बताउनुभयो । उहाँले शहिदहरुको बलिदानलाई यो मुलुका जिम्मेवार दलहरुले समेत अबमुल्यन गरेको भन्दै लोकतन्त्र दिवसलाई राज्यस्तरवाट मनाउँदै शहिदहरुको स्मरण गर्नुपर्नेमा जोड दिनुभयो ।

कार्यक्रममा गैरसरकारी संस्था महासंघ नेपालका केन्द्रीय सचिब राजेन्द्र पौडेल, पर्वत उद्योग बाणिज्य संघका अध्यक्ष ठाकुर वि पौडेल, नेपाल पत्रकार महासंघ पर्वतका अध्यक्ष लक्ष्मण सापकोटा लगायतले सम्वोधन गर्नुभएको थियो ।

नागरिक समाजको सञ्जाल पर्वतका अध्यक्ष माधव पौडेलको अध्यक्षतामा सम्पन्न कार्यक्रमको संचालन गैसस महासंघ पर्वतका सचिब कृष्णप्रसाद शर्माले गर्नुभएको थियो । कार्यक्रममा जिल्लास्थित सामाजिक संघ संस्थाका प्रमुख तथा प्रतिनिधिहरुको सहभागिता रहेको थियो ।
दिवसकै अवसरमा बिहीवार साँझ लोकतान्त्रिक चोक कुश्मामा दिप प्रज्वलन कार्यक्रम समेत सम्पन्न गरिएको छ ।

लाेक कल्याणकारी