काठमाडौं । सरकारले ट्राफिक नियम उल्लंघन गर्नेलाई कडा कारबाही गर्ने तयारी गरेको छ। भौतिक पूर्वाधार तथा यातायात मन्त्रालयले तयार पारेको नयाँ विधेयकको मस्यौदामा न्यूनतम ५ सयदेखि अधिकतम १ लाख रुपैयाँसम्म जरिवाना गर्ने प्रस्ताव गरिएको छ।

प्रस्तावित व्यवस्थाअनुसार सवारी साधनमा अपारदर्शी सिसा प्रयोग गरेमा १ लाख रुपैयाँसम्म जरिवाना लाग्नेछ भने मापसे वा लागू पदार्थ सेवन गरेर सवारी चलाएमा सवारीको प्रकारअनुसार २५ हजारदेखि ५० हजार रुपैयाँसम्म जरिवाना तिर्नुपर्नेछ।

त्यस्तै, मोबाइल फोन प्रयोग गर्दै सवारी चलाउने, लेन मिच्ने, फुटपाथमा सवारी चलाउने वा वान–वे सडकमा विपरीत दिशाबाट सवारी चलाउनेलाई १० हजार रुपैयाँ जरिवाना प्रस्ताव गरिएको छ। हेल्मेट वा सीट बेल्ट नलगाएमा ३ हजार रुपैयाँ जरिवाना लाग्ने व्यवस्था गरिएको छ।

जरिवाना डिजिटल माध्यमबाट भुक्तानी गर्नुपर्ने तथा रकम नतिरेसम्म लाइसेन्स, ब्लुबुक वा अन्य कागजात नियन्त्रणमा लिन सकिने व्यवस्था पनि प्रस्ताव गरिएको छ। बारम्बार नियम उल्लंघन गर्नेलाई थप जरिवानाको व्यवस्था गरिएको मस्यौदामा उल्लेख छ।

लाेक कल्याणकारी