पर्वत । पर्वतको महाशिला गाउँपालिकाले आर्थिक वर्ष २०८३/०८४ का लागि ४६ करोड ४७ लाख ४८ हजार रुपैयाँको बजेट सार्वजनिक गरेको छ। २०औँ गाउँसभामा उपाध्यक्ष धनसुवा विकले बजेट प्रस्तुत गर्दै शिक्षा, कृषि, स्वास्थ्य, पर्यटन, पूर्वाधार विकास तथा रोजगारी सिर्जनालाई प्राथमिकतामा राखिएको बताउनुभयो।

गाउँपालिका अध्यक्ष इश्वरीप्रसाद भुसालले प्रस्तुत गरेको नीति तथा कार्यक्रमअनुसार ‘समृद्ध गाउँपालिका, सुखी नागरिक’को अवधारणालाई कार्यान्वयन गर्ने गरी बजेट विनियोजन गरिएको छ।

शिक्षातर्फ डिजिटल शिक्षण, रियल–टाइम सिकाइ मूल्याङ्कन तथा आवासीय विद्यालय कार्यक्रमलाई निरन्तरता दिइने भएको छ भने कृषितर्फ उत्पादनमा आधारित अनुदान, कृषि एम्बुलेन्स सेवा र ‘प्रोडक्ट अफ महाशिला’ अभियान सञ्चालन गरिने भएको छ।

पूर्वाधारतर्फ वाइचोक–दुक्तान सडक स्तरोन्नतिका लागि १ करोड १० लाख रुपैयाँ विनियोजन गरिएको छ। स्वास्थ्य क्षेत्रका लागि औषधि खरिदमा १७ लाख र महाशिला आधारभूत अस्पतालका उपकरण खरिदका लागि ३० लाख रुपैयाँ छुट्याइएको छ।

पर्यटन प्रवर्द्धन, सामाजिक सुरक्षा, सुशासन तथा स्थानीय रोजगारी अभिवृद्धिलाई समेत बजेटले प्राथमिकतामा राखेको छ। गाउँसभामा प्रस्तुत नीति तथा कार्यक्रम र बजेट सर्वसम्मत रूपमा पारित भएको छ।

लाेक कल्याणकारी