पोखरा । कास्कीका प्रहरी प्रमुख एसपी नवजिन कार्कीले पोखरामा चोरी गर्न काठमाडौंबाट चोरहरू आउने गरेको बताएका छन् । पछिल्लो समय पोखरामा भएका ठूला चोरीका घटनामा बाहिरका गिरोह संलग्न रहेको उनले खुलाए । नुवारथोक टोल विकास संस्था पोखरा ७ ले आयोजना गरेको नागरिक सुनुवाइ कार्यक्रममा उनले यस्तो जानकारी दिएका हुन् ।

पोखरामा चोरी गरेर चोरहरू पुनः काठमाडौं नै फर्किने गरेको कार्कीले बताए । नयाँ शैलीका कारण प्रहरीलाई अनुसन्धान गर्न धेरै समय लाग्ने गरेको उनको भनाइ छ । उनले पोखराको एउटै घरबाट ५० तोला सुन चोरी भएको तथ्य सार्वजनिक गरे । सुनको मूल्य बढेकाले अहिले चोरहरूको मुख्य ध्यान बहुमूल्य धातुमा रहेको उनले बताए । ‘सुनलाई दराजमा होइन, लकरमा राख्ने बानी बसाल्नुपर्छ,’ उनले भने ।

एसपी कार्कीले महिलाहरूलाई धेरै गहना लगाएर बाहिर ननिस्कन पनि आग्रह गरे । गहनाका कारण ज्यानै जाने खतरा हुन सक्ने भन्दै उनले सचेत गराए । सुरक्षाको पहिलो प्रहरी नागरिक स्वयम् भएको उनको भनाइ थियो । टोलमा सिसिटिभी क्यामरा जडान गर्न र बत्ती राख्न स्थानीय नै सक्रिय हुनुपर्नेमा उनले जोड दिए । धेरै सुन र नगद घरमा नराख्न प्रहरीले अनुरोध गरेको छ ।

पोखरा ७ का वडाध्यक्ष राममोहन आचार्यले वडालाई उज्यालो बनाउने अभियान सुरु भएको बताए । मुख्य चोकहरूमा सिसिटिभी क्यामरा जडान गर्ने लक्ष्य महानगरले राखेको छ । चोरी रोक्न स्थानीय आफैँ पनि सजग हुनुपर्ने उनले बताए । आफ्नो टोलमा पालैपालो गस्ती गर्न वडाध्यक्ष आचार्यले आग्रह गरे ।

वडा प्रहरी कार्यालय बैदामका डिएसपी नमराज भट्टराईले टोलमा नयाँ मानिस आए निगरानी राख्न आग्रह गरे । शंकास्पद व्यक्ति देखिए तत्काल प्रहरीलाई खबर गर्न उनले भने । घर बाहिर जाँदा छिमेकीलाई जानकारी दिन र अटोमेटिक लाइट जडान गर्न उनले सुझाव दिए । ‘धेरैले दराजको घर्रामा गहना राख्ने गर्छन्, त्यसो गर्दा चोरीको जोखिम बढी हुन्छ,’ भट्टराईले भने ।

सामुदायिक सेवा केन्द्र बैदामका अध्यक्ष ठाकुर प्रसाद बराल र टोल विकास समितिका अध्यक्ष दामोदर बरालले पनि कार्यक्रममा बोलेका थिए । उनीहरूले शान्ति सुरक्षा कायम गर्न समुदाय र प्रहरी सँगै अघि बढ्नुपर्ने बताए । स्थानीयले टोलमा गस्ती बढाउन र लागू औषध नियन्त्रण गर्न सुझाव दिए । बिहान र साँझ महिलाहरू हिँड्न सहज वातावरण बनाउन उनीहरूले माग गरे ।

लाेक कल्याणकारी