पर्वत । असारे विकासलाई निरुत्साहित गरी समयमै योजना सम्पन्न र बजेट खर्च गर्नका लागि योजना सम्झौतामा कडाई गरिएको छ ।पर्वतको मोदी गाउँपालिकाले चालु आर्थिक वर्षमा बजेट बिनीयोजन भएका योजनाहरु सम्झौता गर्न ताकेता गरेको हो । गाउँपालिकाले सुचना जारी गर्दै उपभोक्ता समिति मार्फत कार्यान्वयन हुने योजनाहरु तत्काल सम्झौता गर्न आग्रह गरेको छ । चालु आर्थिक वर्ष २०८२/८३ को वार्षिक स्विकृत कार्यक्रम अनुसार वडा तहमा उपभोक्ता समिति मार्फत सञ्चालन हुने योजनाहरुको सम्झौता तथा खाता सञ्चालन गर्नको लागि ताकेता गरिएको प्रमुख प्रशासकिय अधिकृत बाबुराम पुरीले जानकारी दिए ।

यहि चैत मसान्त भित्र आवश्यक कागजातहरु सहित सम्झौताका लागि कार्यालयमा उपभोक्ता समितिका पदाधिकारीहरुलाई उपस्थित हुन समेत पालिकाले आग्रह गरेको छ । समयमै सम्झौता भएर काम शुरु नगरे बजेट फ्रिज हुने र योजनाहरुको पारदर्शिता तथा गुणस्तरीय समेत नहुने भएकाले पालिकाले ताकेता गरेको उनको भनाई छ । चैत मसान्त पछि उपभोक्ता समिति मार्फत कार्यान्वयन हुने योजना सम्झौता नगरिने समेत पुरी बताए ।

पालिकाबाट स्वीकृत भएका योजनाहरु आर्थिक वर्षको अन्त्यमा सम्झौता हुने र वर्षायाम शुरु हुने बेला हतार हतारमा गणस्तर हिन काम गरि फछ्र्यौट गरेर भुक्तानी लिने प्रचलन बढ्दै गएपछि अहिलेदेखि नै ताकेता गरिएको हो । पालिकाले रु.१० लाख सम्मका योजना उपभोक्ता समितिमार्फत कार्यान्वयन गर्दै आएका छ । चालु आर्थिक वर्षमा पालिकाका एक सय ५० भन्दा बढि योजना रहेका छन् ।
सडक, खानेपानी, सिंचाईका साना योजनाहरु, सामुदायिक भवन, गोरेटो, घोडेटो बाटो, पदमार्ग लगायतका साना लागतका योजनाहरु उपभोक्ता समिति मार्फत गरिदैँ आएको छ ।

लाेक कल्याणकारी