पोखरा । नेपाल प्याराग्लाइडिङ पाइलट्स क्लबको अध्यक्षमा लक्ष्मण बहादुर थापा निर्वाचित भएका छन् । क्लबको बुधबार सम्पन्न पाँचौँ अधिवेशनले थापाको अध्यक्षतामा नयाँ कार्यसमिति निर्विरोध निर्वाचित गरेको हो ।

जस अन्तर्गत क्लबको उपाध्यक्षमा मित्रलाल बास्तोला, सचिवमा प्रेम तिमिल्सिना र कोषाध्यक्षमा हरी प्रसाद पहारी निर्वाचित भए । त्यसैगरी सदस्यमा रविन अधिकारी, ओमित गुरुङ, ईस्का राई, राम तामाङ र राजेश गिरी निर्वाचित भएका छन ।

अधिवेशनको उद्घाटन गर्दै पोखरा पर्यटन परिषदका अध्यक्ष तारानाथ पहारीले प्याराग्लाइडिङले पोखरामा पर्यटकको बसाइ अवधि बढाउन र साहसिक पर्यटन प्रवद्र्धनका लागि महत्वपूर्ण भूमिका खेलेको बताए । उनले प्याराग्लाइडिङ पोखरामा पर्यटकको पहिलो रोजाइ भएकाले सबै संस्था र मानिसहरू यसको प्रवद्र्धनमा लाग्नुपर्नेमा जोड दिए ।

क्लब अध्यक्ष दीपक थापाको अध्यक्षतामा भएको उक्त कार्यक्रममा सचिव प्रेम तिमल्सिनाले प्रगति प्रतिवेदन तथा कोषाध्यक्ष सुमन थापाले आर्थिक प्रतिवेदन प्रस्तुत गरेका थिए ।

नवनिर्वाचित अध्यक्ष लक्ष्मण बहादुर थापाले आगामी कार्यकालमा पाइलटहरूको हक, हित तथा सुरक्षालाई पहिलो प्राथमिकतामा राख्ने बताए । उनले भने, उडान मापदण्ड तथा सुरक्षा प्रणालीलाई अझ सुदृढ बनाउनुका साथै टेकअप तथा ल्यान्डिङ क्षेत्रको दीर्घकालीन व्यवस्थापनका लागि स्थानीय तहसँग सहकार्य गर्दै स्थायी पूर्वाधार विकास गर्नेछौं ।

उनले पाइलटहरूको बीमा, पारिश्रमिक तथा सामाजिक सुरक्षा सम्बन्धी विषयमा स्पष्ट नीति निर्माणका लागि निरन्तर पहल गर्ने प्रतिबद्धता व्यक्त गरे । साथै नयाँ पाइलटहरूको क्षमता अभिवृद्धि तथा अन्तर्राष्ट्रिय प्रतिस्पर्धामा सहभागिता बढाउन तालिम, प्रशिक्षण तथा प्रोत्साहन कार्यक्रम सञ्चालन गर्ने उनको भनाइ थियो ।

नेपाल प्याराग्लाइडिङ पाइलट्स क्लब समग्र पाइलटहरूको हक, हित तथा सुरक्षाको संरक्षण र प्रवद्र्धन गर्ने उद्देश्यले वि.सं. २०७३ साल भाद्र ८ गते जिल्ला प्रशासन कार्यालयमा विधिवत् दर्ता भई कार्यारम्भ गरेको संस्था हो । हालसम्म ४ सय १२ जना नेपाली पाइलटहरूले टेन्डम लाइसेन्स प्राप्त गरिसकेका छन् ।

लाेक कल्याणकारी