पर्वत । नेकपा (माओवादी केन्द्र) का अध्यक्ष तथा पूर्व प्रधानमन्त्री पुष्पकमल दाहाल ‘प्रचण्ड’ले दैनिकरूपमा ५० लाख रुपैयाँसम्मको भ्रष्टाचार भइरहेको भन्दै अब गम्भीर निर्णयको समय आएको बताएका छन्।

शुक्रवार पर्वतमा आयोजित ‘जनसंवाद’ कार्यक्रममा बोल्दै प्रचण्डले पुष्पलाल मध्य पहाडी लोकमार्ग क्षेत्रमा प्रत्यक्ष जनसम्पर्क अभियानका क्रममा यस्तो बताएका हुन्। उनले माओवादी अब आन्दोलनभन्दा बढी सरकारलाई खबरदारी गर्दै सुशासनयुक्त मुलुक निर्माणको अभियानमा लागेको बताए।

उनले दैनिकरूपमा भ्रष्टाचारको ठूलो रकम चलिरहेकोप्रति कटाक्ष गर्दै भने, “एकै दिनमा ५० औँ लाखको भ्रष्टाचार भएको कुरा छताछुल्ल भएको छ। यही अवस्था रहेमा इमानदार दलहरूले गम्भीर निर्णय लिनुपर्ने हुन्छ।”

उनले माओवादी सरकारमा हुँदा भ्रष्टाचार विरुद्ध जस्तोसुकै मूल्य चुकाएर लडेको पनि स्मरण गरे। भ्रष्टाचारको मुहान माथिबाट सफा नभएसम्म विकास सम्भव नरहेको उनले स्पष्ट पारे।

प्रचण्डले देशभित्र रोजगारी र आशा दिने उद्देश्यले देशव्यापी जनसंवाद अभियान थालेको जानकारी दिँदै, गाउँमा बाटो त बनेको भए पनि चल्ने सवारी नभएको, विद्यालय भवन बने पनि विद्यार्थी नहुँदा चिन्ता व्यक्त गरे।

उनका अनुसार मधेसदेखि हिमालसम्म युवालाई देशमै समेट्ने अभियान माओवादीले चलाइरहेको छ। सामाजिक सञ्जालमा हावा कुरा गर्दा बुद्धिजीवी चिन्तित रहेको भन्दै देशमा अझै पनि जनतामा आशा रहेको उनको भनाइ थियो।

यस अभियानमा प्रचण्डसँगै वरिष्ठ उपाध्यक्ष, उपाध्यक्ष, महासचिव, उपमहासचिवलगायत माओवादी नेताहरू सहभागी छन्।

माओवादीले जनसंवाद कार्यक्रमलाई आफ्ना नेता–कार्यकर्तासँग मात्र नभई आम नागरिक, सुरक्षाकर्मी, व्यवसायी, कर्मचारीहरूसँग प्रत्यक्ष संवादको माध्यम बनाएको छ, जसबाट सामाजिक समस्या पहिचान गरी योजनाबद्ध निर्णय लिने अपेक्षा गरिएको छ।

लाेक कल्याणकारी