पर्वत । मोदिगाउँपालिका वडा नम्बर ८ चित्रेमा सार्वजनिक सुनुवाइ कार्यक्रम सफलतापूर्वक सम्पन्न भएको छ। गाउँपालिकाबाट सञ्चालन भइरहेका कार्यहरूबारे प्रत्यक्ष रूपमा जनतालाई जानकारी दिन र आगामी वर्षको योजनाका लागि सुझाव तथा माग संकलन गर्न पालिकाले सम्पूर्ण ८ वडामा यस्ता कार्यक्रम सञ्चालन गरिरहेको हो।

कार्यक्रमका प्रमुख अतिथि तथा मोदिगाउँपालिका अध्यक्ष हिरादेवी शर्माले चित्रे क्षेत्र पर्यटनमुखी भएको उल्लेख गर्दै वडामा पूर्वाधार, खानेपानी, र शिक्षा क्षेत्रमा विशेष ध्यान दिनुपर्ने बताइन्। उनले स्वदेश तथा विदेशबाट पर्यटक आकर्षित गर्न यस्ता कार्यक्रम निरन्तर सञ्चालन गरिनुपर्नेमा जोड दिँदै पालिकाले आवश्यक सहयोग गर्ने प्रतिवद्धता जनाइन्।

कार्यक्रमका विशिष्ट अतिथि तथा उपाध्यक्ष विमल लामिछानेले पछिल्लो समयमा युवाहरूको वैदेशिक पलायन बढ्दै गएको भन्दै युवालाई रोक्न युवामुखी कार्यक्रम ल्याउने र पालिकाले यसमा पूर्ण प्रयास गर्ने बताए।

प्रमुख प्रशासकीय अधिकृत बाबुराम पुरीले पालिकाले हालसम्मका कामहरू चुस्तदुरुस्त रूपमा सम्पन्न गरिरहेको स्पष्ट पार्दै जनताबाट आएका प्रश्नहरूको उत्तर दिए। साथै, सामाजिक विकास शाखाका प्रमुख दिनेश शर्मा, इन्जिनियर नवीन साही लगायत अन्य कर्मचारीहरूले समेत प्रश्नहरूको समाधान दिनुभएको थियो ।।

वडामा भइरहेका कामहरूको विवरण वडा सचिव मनोज नेपालले प्रस्तुत गरे। कार्यक्रममा स्टाफ नर्स सुस्मिता पौडेल, पशुशाखाका प्रमुख डा. गोपाल पासी, कार्यपालिका सदस्य, विभिन्न विद्यालयका प्रधानाध्यापक, राजनीतिक दलका प्रतिनिधि, समाजसेवीहरू लगायतको उल्लेख्य उपस्थिति रहेको थियो।

मोदिगाउँपालिकाले यस कार्यक्रममा सुत्केरी महिलाहरुलाई ‘अध्यक्ष सँग सुत्केरी’ कार्यक्रमअन्तर्गत भत्ता वितरणसमेत गरेको जानकारी दिएको छ।

कार्यक्रम वडा अध्यक्ष सुकबहादुर गुरुङको अध्यक्षतामा सम्पन्न भएको थियो भने स्वागत मन्तव्य वडा सचिव मनोज नेपालले राखेका थिए। कार्यक्रमको सहजीकरण सञ्चारिका समूह पर्वतले तथा सञ्चालन विष्णु सापकोटा गौतमले गरेका थिए।

लाेक कल्याणकारी