पर्वत । राष्ट्रिय युवा संघ नेपालको ३६ औं स्थापना दिवसको अवसरमा राष्ट्रिय युवा संघ नेपाल, पर्वतले कुश्मा नगरपालिका–५ स्थित गुप्तेश्वर वेदबेदांग संस्कृत पाठशालामा खाद्यान्न वितरण गरेको छ ।

स्थापना दिवसमा सामाजिक क्षेत्रमा योगदान पुर्‍याउने उद्धेश्यले चामल, दाल, तेल चीनि, गेडागुडी जस्ता खाद्यान्न वितरण गरेको हो । राष्ट्रिय युवा संघ पर्वतका अध्यक्ष विनोद थापा र एमाले नेतृ कुश्मा नगरपालिकाकी उपप्रमुख स्वस्थानी रिजालले पाठशालाका बटुकलाई खाद्यान्न हस्तान्तरण गर्नुभएको थियो ।

कार्यक्रममा बोल्दै प्रमुख अतिथि कुश्मा नगरपालिकाकी उपप्रमुख स्वस्थानि रिजालले युवाहरु मुलुक परिवर्तनको संवाहक रहेको बताउनुभयो । आज हरेक दिनजसो युवा पुस्ता विदेश पलायन भैरहेका बेला स्वदेशमै केहि गर्नुपर्छ भनेर राष्ट्रिय युवा संघमा गोलबन्द युवाहरुले पाठशालालाई गरेको सहयोगको उच्च प्रसंसा गर्नुभएको छ । उहाँले संस्कृत भाषा, धर्म, संस्कार र मुल्यहरूको संरक्षण तथा संवद्र्धनमा संस्कृत पाठशालाहरूले खेलिरहेको भूमिकाप्रति सम्मान व्यक्त गर्दै भन्नुभयो “संस्कृत पाठशालाहरू हाम्रो मौलिक परिचयका आधार हुन्। यस्ता संस्थाहरूमा खाद्यान्न जस्ता सहयोग गर्नु युवा संघका सदस्यहरूले देखाएको सकारात्मक र प्रेरणादायी पहल हो । स्थानीय सरकार र युवाबीच सहकार्य आवश्यक छ, जसबाट दीर्घकालीन परिवर्तन सम्भव छ ।

उहाँले यस्ता कार्यहरूले युवामा सामाजिक उत्तरदायित्वको भावना बढ्ने र भविष्यमा अझ ठूला योजनाहरू सफलतापूर्वक कार्यान्वयन गर्न मद्दत पुग्ने विश्वास व्यक्त गर्नुभयो ।

कार्यक्रममा स्वागत मन्तव्य राष्ट्रिय युवा संघ पर्वतका सचिव प्रकाश थकालीले राख्नुभएको थियो । उहाँले युवा संघले केवल राजनैतिक गतिविधिमा मात्र सीमित नरही समाजसेवामूलक कार्यहरूमा पनि सक्रियता बढाइरहेको बताउनुभयो ।

कार्यक्रमको सञ्चालन रामसागर लामिछानेले गर्नुभएको थियो । राष्ट्रिय युवा संघ पर्वतका अध्यक्ष बिनोद थापाले सहभागी सबैलाई धन्यवाद ज्ञापन गर्दै यस्ता गतिविधिमा निरन्तरता दिने प्रतिबद्धता व्यक्त गर्नुभयो । खाद्यान्न वितरण कार्यक्रममा संघका पदाधिकारीहरू, सदस्यहरू, पाठशालाका विद्यार्थी, गुरुजन तथा स्थानीय नागरिकहरूको समेत उल्लेखनीय उपस्थिति रहेको थियो । कार्यक्रमले समाजमा सकारात्मक सन्देश प्रवाह गरेको आयोजकहरूले बताएका छन् ।

लाेक कल्याणकारी