पर्वत।पर्वतको मोदी गाउँपालिकाले १५ वर्षदेखि बाँझो रहेको जमिनमा व्यावसायिक आलुखेती सुरु गरेर आम्दानी तथा रोजगारीमा नयाँ आशा जगाएको छ। क्याङ क्षेत्रमा गरिएको यो आलुखेती प्रधानमन्त्री रोजगार कार्यक्रमअन्तर्गत गरिएको हो, जसमा नियुक्त श्रमिकहरूलाई परिचालन गरिएको छ।
रोजगार सेवा केन्द्रका प्रमुख अनमोल क्षेत्रीका अनुसार पहिलोपटक परीक्षणस्वरूप गरिएको छ रोपनीको आलुखेती निकै सफल भएको छ। उनले भने,”प्रधानमन्त्री रोजगार कार्यक्रम निष्प्रभावी भइरहेको बेला कृषि उत्पादनमा श्रमिक परिचालन गरेर यसको प्रभावकारिता देखाइएको छ। परीक्षण खेती उत्साहजनक रहेकाले आगामी दिनमा यो योजना विस्तार गरिनेछ।”
व्यावसायिक आलुखेतीका लागि पालिकाले ९५ हजार रुपैयाँ बीउ र मल खरिदमा लगानी गरेको छ। उत्पादनका लागि वडा नं. १, ३ र ४ ‘पकेट’ क्षेत्र मानिन्छन्।
गाउँपालिका अध्यक्ष हीरादेवी शर्माका अनुसार पहिलो वर्ष जग्गा निःशुल्क प्राप्त गरिएको हो भने आगामी वर्षदेखि जग्गा भाडामा लिएर खेती निरन्तर गरिने योजना रहेको छ। यस वर्ष ५० क्विन्टलभन्दा बढी आलु उत्पादन हुने अनुमान गरिएको छ।
यस पहलले बाँझो जमिनको उपयोग, कृषिमा रोजगारी सिर्जना र आत्मनिर्भर उत्पादनतर्फको प्रयासलाई मजबुत बनाएको छ।
