पर्वत । जिल्लाको मोदी गाउँपालिकाले वडा न ४ क्याङमा सार्वजनिक सुनुवाई कार्यक्रम सम्पन्न गरेको छ । गाउँपालिकाले आयोजना गरेको उक्त कार्यक्रममा आगामी आर्थिक बर्षको योजना छनौटका लागि सुझाबहरु संकलन समेत गरिएको थियो । गाउँपालिकाले आयोजना गरेको सार्वजनिक सुनुवाई कार्यक्रममा स्थानीयले गाउँपालिकाले चालु आर्थिक बर्षमा प्रवाह गरेका सेवा र सञ्चालन गरेका आयोजनाकहरुको विषयमा आफ्नो आफ्नो धारणा ब्यक्त गरेका थिए ।
गाउँपालिकाले चालु बर्षको समिक्षा सहित आगामी बर्षको योजना छनौट, नीति तथा बजेट योजना निर्माणको लागि वडाबासीहरुसंग सुझाब संकलन गर्नका लागि सार्वजनिक सुनुवाई कार्यक्रमको आयोजना गरेको हो ।
सार्वजनिक सुनुवाईको क्रममा सहभागीहरुले गाउँपालिकाले शिक्षा स्वस्थ्य, र कृषिलाई प्राथमिकता दिनुपर्ने धारणा ब्यक्त गरेका छन् । खानेपानी, सडक, सिंचाई र कृषि क्षेत्रका प्रश्नहरु मार्फत सहभागीहरुले गाउँपालिकासंग यी विषयमा ठोस जवाफ मागेका थिए ।
गाउँपालिकाका अध्यक्ष हिरादेवी शर्माले सहभागीहरुको प्रश्नहरुको उत्तर दिदै आगामी दिनमा गाउँपालिकाले नीति, बजेट तथा कार्यक्रम तय गर्दा वडाबासीहरुको सुझाबलाई आत्मसाथ गर्ने प्रतिबद्धता ब्यक्त गर्नुभएको छ ।
प्रमुख प्रशासकीय अधिकृत बाबुराम पुरीले स्थानीय तहको शासन प्रक्रियामा पारदर्शीता, कानूनी शासन र जवाफदेहिता रहनुपर्ने धारणा ब्यक्त गर्नुभयो । उहाँले असल प्रशासन, कुशल सेवा प्रवाह र कानूनी राज्यको प्रत्याभूति स्थानीय समुदायले प्राप्त गर्नुपर्ने विचार ब्यक्त गर्नुभयो ।
सहभागीहरुले उठाएका विषयमा अध्यक्ष शर्मा, प्रमुख प्रशासकीय अधिकृत पुरीसंगै विषयगत शाखाका प्रमुखहरुले समेत जवाफ दिनुभएको थियो । सामाजिक विकास शाखाका प्रमुख दिनेश शर्माले शिक्षा र मानव विकाससंग सम्बन्धित प्रश्नहरुको उत्तर दिनुभएको थियो । कार्यक्रममा कृषि शाखाको तर्फबाट सुष्मा सापकोटाले सहभागीहरुको प्रश्नको उत्तर दिनुभएको थियो ।
वडा न ४ का वडाअध्यक्ष मोहन चोचाङ्गी को अध्यक्षतामा सम्पन्न कार्यक्रममा वडा सचिव कृष्ण सुबेदीले बार्षिक कार्यक्रम र सेवा प्रवाहको अवस्था प्रस्तुत गर्नुभएको थियो, भने कार्यपालिका सदस्य लक्ष्मी बिकले स्वागत मन्तब्य राख्नुभएको थियो । कार्यक्रमको सहजीकरण सञ्चारिका समुह पर्वतले गरेको थियो ।
