पर्वत । पर्वत जिल्ला स्तरीय राष्ट्रपति रनिङ्ग शिल्ड प्रतियोगिता आगामी जेठ ५ र ६ गते संचालन गरिने भएको छ ।जिल्ला खेलकुद विकास समिति पर्वतको सोमवार सम्पन्न बैठकले जेठ ५ र ६ गते सदरमुकाम कुश्माबजारको वडागाउँ खेल मैदानमा संचालन गर्ने निर्णय गरेको हो ।
प्रतियोगितामा खेलाडीहरुलाई सक्रिय सहभागिता गराउनका लागि समितिले जिल्लाका सातवटै पालिकालाई अनुरोध गरेको छ । यस अघि पर्वतका दुई नगरपालिका सहित सातवटै पालिकाले राष्ट्रपति रनिङ्ग शिल्ड प्रतियोगिता संचालन गरिसकेका छन् । पालिका स्तरवाट छनौट भएका खेलाडीहरु जिल्ला स्तरीय प्रतियोगितामा सहभागि हुन पाउने जिल्ला खेलकुद विकास समिति पर्वतका अध्यक्ष बुद्ध पुनले जानकारी दिनुभयो ।
पुनका अनुसार प्रतियोगितामा छात्र तथा छात्रा भलिबल प्रतियोगिता, छात्र तथा छात्रा कबड्डी प्रतियोगिता, एथलेटिक्स छात्र, छात्राको प्रतियोगिता हुने भएको छ । एथलेटिक्स अन्तर्गत दौड प्रतियोगिता एक समय मिटरदेखि तीन हजार मिटरसम्मको हुने भएको छ भने भने छात्रा दौड प्रतियोगिता पनि सोहि अनुसार हुने भएको छ ।
यसैगरी हाईजम्प, लङजम्प, त्रिपलजम्प, ज्याभलिङथ्रो, सटपुट थ्रो, मार्सल आर्टतर्फ सितेरेयिो कराँते र छात्र छात्रा तेक्वान्दो प्रतियोगिता समेत संचालन गरिने अध्यक्ष पुनले जनाकारी दिनुभयो ।
प्रतियोगितामा खेलाडी सहभागि गराउने पालिकाले प्रतियोगिता शुरु हुनुपुर्व रु. २५ हजार रुपैया बुझाउनुपर्ने उल्लेख गरिएको छ । यसैगरी विद्यार्थीले फोटो सहितको अनुसूचि १ को सहभागि फारम भर्नुपर्ने छ भने विद्यार्थी नियमित अध्ययनरत हुनुपर्ने छ । कक्षा १२ सम्मका विद्यार्थीले प्रतियोगितामा भाग लिन पाउने भएका छन् । खेलाडीको जन्मदर्ताको फोटोकपी, र इमिक्सको अभिलेख फारमका साथमा अनिवार्य पेश गर्नुपर्ने छ । बास्तविक विद्यार्थी नभई अन्य खेलाडी सहभागि गराएको पाईएमा खेलकुद कानून बमोजिम कारवाही गरिने भएको छ ।
कबड्डी खेलतर्फ छात्र ७० केजी र छात्राको वजन ६५ केजी सम्म खेल्न पाउने व्यवस्था गरिएको छ ।जिल्ला खेलकुद विकास समितिका अध्यक्ष पुनले खेललाई व्यवस्थित, मर्यादित र सभ्य रुपमा सम्पन्न गर्नका लागि आवश्यक तयारीमा जुटेको बताउनुभयो । जिल्ला स्तरवाट उत्कृष्ट बनेका विद्यार्थी प्रदेश तथा संघ स्तरीय प्रतियोगितामा पनि सहभागि हुन पाउने भएकाले आवश्यक तयारी सहित स्वस्थ्य प्रतिस्पर्धा गर्न उहाँले आग्रह गर्नुभएको छ ।
