काठमाडौं। नेकपा (एकीकृत समाजवादी) का अध्यक्ष माधव कुमार नेपालले प्रधानमन्त्री पुष्पकमल दाहाल ‘प्रचण्ड’ ले दरबार हत्याकाण्डबारे विचार नपुर्याइ बोलेको टिप्पणी गरेका छन् । आज (बिहिबार) समाजवादी पत्रकार संघ धनुषाले जनकपुरधाममा आयोजना गरेको पत्रकार सम्मेलनलाई सम्बोधन गर्दै उनले उक्त विषयमा प्रचण्डले कसैसँग पनि सल्लाह नगरी बोलेको भन्दै असन्तुष्टि जनाएका हुन् ।

प्रधानमन्त्री प्रचण्डले गत माघ १५ गते बाराको सिमरा विमानस्थलमा सञ्चारकर्मीसँग कुराकानी गर्दै २०५८ सालमा तत्कालीन राजा वीरेन्द्रको वंश विनाश हुनेगरी भएको दरबार हत्याकाण्डको छानबिन हुने बताएका थिए ।वीरगञ्जमा आयोजित एक सभामा पूर्वराजा ज्ञानेन्द्र शाहले दरबार हत्याकाण्डका बारेमा बोलेपछि उक्त विषयमा फेरि बहस सुरु भएको छ । आफ्ना दाजुको वंशनाशपछि राजगद्धीमा बसेका र देशमा राजसंस्थाको अस्तित्व समाप्त भएपछि नारायणहिटीबाट नागार्जुन पुगेका पूर्वराजा यतिका समय मौन रहेर २२ वर्षपछि दरबार हत्याकाण्डका बारेमा सार्वजनिक सभामा बोलेका थिए ।

दरबार हत्याकाण्डपछि तत्कालीन नेकपा (एमाले) को महासचिवको हैसियतले माधव नेपाल पनि छानविन समितिमा थिए । पछि उनलाई एमालेले उक्त समितिबाट फिर्ता बोलाएको थियो ।कांग्रेस नेता स्वर्गीय गिरिजा प्रसाद कोइरालाले समेत यस्ता विषयमा बोल्नुभन्दा पहिला आफूसँग सल्लाह गर्ने गरेको स्मरण गराउँदै उनले प्रचण्डले किन बोलेका हुन् भन्ने विषयमा आश्चर्य व्यक्त गरे ।

साथै, एमाले अध्यक्ष केपी शर्मा ओलीले गृहमन्त्री हुँदै प्रधानमन्त्री भएको हुनाले केही सूचना भएरनै विरेन्द्रको वंशनाश हुने गरी भएको घटनाको दोषी दिपेन्द्र होईनन् भनेर बोलेको हुनुपर्ने उनले बताए । अध्यक्ष नेपालले राजतन्त्र र राजसंस्था मसानघाटको मुर्दा भइसकेको टिप्पणी गर्दै फर्काउने सपना नदेख्नसमेत चेतावनी दिए ।

लाेक कल्याणकारी