काठमाडौं – सत्तारुढ नेपाल कम्युनिस्ट पार्टी (नेकपा) केन्द्रीय कमिटी बैठकमा अध्यक्ष पुष्पकमल दाहाल ‘प्रचण्ड’ले पेश गरेको प्रतिवेदनमा अर्का अध्यक्ष प्रधानमन्त्री केपी शर्मा ओलीको गम्भीर असहमति रहेको खुलासा भएको छ ।केपी ओलीका विश्वासपात्र रहेका सरकारका प्रवक्ता तथा सञ्चारमन्त्री गोकुल बाँस्कोटाले नेकपाको केन्द्रीय कमिटी बैठकमा पेश भएको प्रतिवेदनमा ओली सहमत नभएको खुलासा गरेका छन् । प्रचण्डले राजनीतिक प्रतिवेदनमा ‘अमेरिकाको इन्डो प्यासिफिक रणनीतिमा चीनलाई घेर्ने उद्देश्य रहेको’ उल्लेख गरेपछि ओलीको असहमति रहेको केन्द्रीय सदस्य समेत रहेका बास्कोटाले बताएका छन् ।

भिडियो हेर्न यहाँ क्लिक गर्नुहोस् । subscribe मा क्लिक गरेपछि सँधै भिडियो हेर्न पाईनेछ । नजिकैको बेल (घण्टि) मा थिचे अपलोड गर्नासाथ पहिलो दर्शक बन्न पाउँनुहुनेछ ।

बिहीबार मन्त्रिपरिषद् बैठकका निर्णय सार्वजनिक गर्न मन्त्रालयमा आयोजित नियमित पत्रकार सम्मेलनमा उनले असंलग्न परराष्ट्र नीति विपरीत कुनै पनि देशका नीति र नियतबारे टीकाटिप्पणी गर्ने पक्षमा प्रधानमन्त्री ओली नरहेको बताएका छन् । ओली अमेरिकी सहयोगको एमसीसी परियोजना पारित गर्ने मनस्थितिमा रहेका बेला प्रचण्डले अमेरिकी नीति चीनविरोधी भएको कुरा प्रतिवेदनमा उल्लेख गरेका छन् ।

‘हामीसँग यो क्षमता छैन कि कुनै शक्ति राष्ट्रको कुन पोलिसी कुन देशलाई घेर्ने वा कुन देशलाई छेक्ने ढंगले ल्याइयो । यस्तो काल्पनिक दृष्टिकोण राख्नु हुँदैन । एउटा शक्ति राष्ट्रले कुन पोलिसी ल्याउँछ त्यसको आधिकारिक ब्याख्याता हामीझै भएर जानु हुँदैन,’ उनले भने ।

यसअघि भेनेजुयला प्रकरणमा एउटा विज्ञप्ति निकाल्दा तीन पटक सच्याउनुपरेको स्मरण गर्दै बास्कोटाले शक्ति राष्ट्रका नीतिको बारेमा नेकपाले अनावश्यक रुपमा शब्दजाल प्रयोग गर्न नहुने स्पष्ट पारेका छन् । नेकपा बैठकमा पेश भएको आधिकारिक प्रतिवेदनभन्दा पनि प्रधानमन्त्री ओलीले मौखिक गरेको भाषण नेकपाको आधिकारिक धारणा भएको मन्त्री बाँस्कोटाले बताएका छन् । मन्त्री बास्कोटाले भनेका छन्, ‘हामीले नचाहिएका कुरा उठाएर जबरजस्ती स्थापित गर्न खोज्नु हुन्न । शक्ति राष्ट्रलाई उचाल्ने पछार्ने पनि होइन । एउटा वक्तव्य दिँदा के भयो ? सातचोटी जति सच्याउनुपर्‍यो । अमेरिका र चीनका रणनीतिको व्याख्या गर्ने काम नेकपाको होइन । प्रधानमन्त्री यसमा प्रस्ट हुनुहुन्छ ।’

विगतका पत्रकार सम्मेलनलाई छोट्याउन कोसिस गर्ने प्रवक्ता बाँस्कोटाले यसपालि करीब आधा घण्टासम्म एमसीसी सैन्य रणनीतिभन्दा बाहिरको विषय रहेको स्पष्ट पार्न बोलेका थिए । बास्कोटाले भारत र चीनबाट पनि अनुदान तथा ऋण सहायता लिँदा विभिन्न शर्त स्वीकार गरिएको बताएका छन् । केही व्यक्तिले राजनीतिक बजार तताउन एमसीसीलाई विवादमा पारेको उनले बताएका छन् ।

तत्कालीन नेकपा एमाले र माओवादी केन्द्र मिलेर एउटै पार्टी बनेपनि वैचारिक र व्यावहारिक रुपमा दुवै एक भएको देखिएको छैन । प्रचण्ड र ओली समूह छुट्टाछुट्टै दाउमा विदेशीका गोटी बनेको स्पष्ट देखिँदै आएको छ । प्रचण्डले चीनतिर ढल्केर प्रतिवेदन लेखेका छन् भने ओली पक्षले अमेरिकातिर ढल्केर एमसीसीको पक्ष लिइरहेका छन् ।

लाेक कल्याणकारी