प्रधानमन्त्री केपी ओलीकै ट्वीटर अकाउन्ट असुरक्षित भएको खुलेपछि प्रहरीले गम्भीर अनुसन्धान सुरु गरेको छ । प्रधानमन्त्रीको ट्वीटर अकाउन्ट दुरुपयोगले एकाएक जटिल रुप लिएपछि घटना अनुसन्धानको जिम्मा नेपाल प्रहरीले लिएको हो । ट्वीटर अकाउन्ट दुरुपयोग सम्बन्धमा प्रधानमन्त्रीको सचिवालयका कर्मचारीमाथि समेत अनुसन्धान गर्नुपर्ने भएकाले नेपाल प्रहरीलाई जिम्मा लगाइएको हो । घटना सम्बन्धमा प्रहरीको साइबर ब्युरोले अनुसन्धान गरिरहेको छ ।

प्रधानमन्त्रीका आइटीविज्ञ अली असगरले शनिबार बिहान ११ बजे नै घटना सम्बन्धमा अनुसन्धान गर्न सम्पूर्ण डाटा ब्युरोलाई जिम्मा लगाइएको बताए । उनले भने, ‘प्रधानमन्त्रीको ट्विटर अकाउण्ट एक प्रकारले ह्याक नभई दुरुपयोग भएको पाइयो । अनुसन्धान गहिरिएर नै गर्नुपर्ने भयो । त्यसो हुँदा हामीसँग भएका सम्पूर्ण डाटा अनुसन्धान गर्न साइबर व्युरोलाई जिम्मा लगाएका छौं । उनीहरुबाट अनुसन्धान भइरहेको होला ।’

प्रधानमन्त्रीको ट्वीटर ह्यान्डल प्रधानमन्त्री बाहेक सञ्चारविज्ञ रामशरण बजगाईंले चलाउँछन् । त्यसबाहेक ट्वीटरको पासवर्ड प्रमुख सल्लाहकार विष्ण रिमाल र आइटीविज्ञ अलीलाई थाहा छ । उनीहरुबाट ट्वीटर दुरुपयोग भएको प्रारम्भिक अनुसन्धानबाट खुलेको छैन । तर, प्रहरीको अनुसन्धानले सचिवालयभित्रकै एक आइफोनबाट ट्वीटर दुरुपयोग भएको देखाएको छ । नयाँ पत्रिकाबाट

लाेक कल्याणकारी