पर्वत । बर्ड एजुकेसन सोसाइटीले आफ्नो नियमित साप्ताहिक कार्यक्रमअन्तर्गत शनिबार चितवन राष्ट्रिय निकुञ्जको सीमा क्षेत्रमा चरा अवलोकन कार्यक्रम सम्पन्न गरेको छ। राप्ती नदीको किनारा, ढुङ्ग्रे खोला लगायत पर्यटक सूचना केन्द्र वरपरको क्षेत्रमा यो कार्यक्रम सञ्चालन गरिएको थियो।
कार्यक्रममा बर्ड एजुकेसन सोसाइटीका अध्यक्ष विजय गिरी र निवर्तमान अध्यक्ष टिकाराम गिरी लगायत अन्य चराप्रेमीहरूको सक्रिय सहभागिता रहेको थियो।कार्यक्रममा निबर्तमान अध्यक्ष टिकाराम गिरीले चराहरुकाे बिशेषताका बारेमा जानकारी गराउनुभएकाे थियाे । कार्यक्रमको क्रममा उपस्थित गाइड तथा पर्यटकहरूसँग समेत अनुभवहरू साटासाट गरिएको थियो।
यसपटकको अवलोकनमा विदेशी पर्यटकहरूले पनि सहभागिता जनाएका थिए। यसरी नेपाली र विदेशी चराप्रेमीहरूले सँगै मिलेर यस क्षेत्रमा पाइने विभिन्न प्रजातिका चराहरूको अवलोकन गर्नु निकै उत्साहजनक रहेको सोसाइटीले जनाएको छ।
साथै, विभिन्न नेचर गाइडहरू आफ्ना पाहुना हरूका साथ चरा अवलोकनमा सहभागी भएका थिए। यसरी स्थानीय चरा शिक्षा समाज र राष्ट्रिय निकुञ्जको सौन्दर्यलाई विश्वभर चिनाउने विदेशी पाहुनाहरूबीचको सहकार्यले चितवनको पर्यटन र चरा संरक्षणको महत्त्वलाई थप उजागर गरेको छ।
महत्त्वपूर्ण प्रजातिका चराहरूको अवलोकन
यस अवलोकनको क्रममा सहभागीहरूले यस क्षेत्रका रुडी शेलडक (Ruddy Shelduck), शिख्रा (Shikra), ओरिएन्टल हनी बजार्ड (Oriental Honey Buzzard), ग्रे हेरोन (Grey Heron) जस्ता महत्त्वपूर्ण र आकर्षक प्रजातिका चराहरूको सफल अवलोकन गर्न पाएका थिए।
यस प्रकारका कार्यक्रमहरूले चरा तथा वन्यजन्तु संरक्षणमा सचेतना बढाउनुका साथै पर्यटन प्रवर्द्धनमा समेत महत्त्वपूर्ण भूमिका खेल्ने गरेको छ।
