काठमाडौं । नेकपा माओवादी केन्द्रका उपमहासचिव शक्ति बस्नेतले बजेटमा गरिएको भूमि बैंकको व्यवस्था बिचौलिया पोस्नका लागि ल्याइएको आरोप लगाएका छन् ।

प्रतिनिधिसभाको आजको बैठकमा बजेटमाथिको छलफलमा सहभागी हुँदै सांसद बस्नेतले पीँधमा रहेका किसानको आर्थिक जीवनस्तर उकास्न नभई सीमित व्यक्तिको हितलाई ध्यानमा राखेर भूमि बैंकको व्यवस्था गरिएको बताएका हुन् ।

‘गरिब किसानहरूलाई उत्पादनमा सहभागी गराउने, उनीहरूको माध्यमबाट भूमिको उत्पादकत्व वृद्धि गर्ने, किसानको वास्तविक जीवनमा परिवर्तन ल्याउने, सामाजिक न्यायलाई स्थापित गर्ने आजको आवश्यकता हो । तर भूमि बैंकले किसानका वास्तविक हितलाई सम्बोधन गर्ने छैन,’ उनले भने, ‘भूमि बैंकले सीमित व्यवसायीहरूलाई अझ तीभित्र पनि बिचौलियाहरूको पक्षपोषण गर्ने बढी सम्भावना देखिरहेको छु ।’

उनले भूमिका व्यवस्थापन ठिक ढंगले नभएको पनि बताए । पिँधमा बसेका जनताको बारेमा सरकारको कुनै चिन्त नरहेको पुष्टि भएको पनि उनले बताए ।

‘पीँधमा बसेका किसानबारे बजेटले चिन्ता गरेको छैन । किसानको जीवनमा आर्थिक उपार्जनको कुरा बजेटमा छैन,’ उनले थपे ।

सांसद बस्नेतले लामो समय लगाएर बनाइएको ऊर्जा विकासको मार्गचित्रलाई पनि बजेटले बेवास्ता गरेको बताए । यस्तै, सामान्य पूर्वाधार नहुँदा ओझेलमा परेका थुप्रै पर्यटकीय क्षेत्रको विकासतर्फ पनि सरकारको ध्यान नपुगेको टिप्पणी गरे ।

लाेक कल्याणकारी