पर्वत। गैसस महासंघ नेपाल जिल्ला शाखा पर्वतको २५ ओै साधारणसभा, नवौं अधिवेशन तथा दशौँ जिल्ला नागरिक सम्मेलन आइतबार कुश्मामा सम्पन्न भएको छ। अधिवेशनबाट खुर्कोट युवा क्लबका अध्यक्ष कृष्णप्रसाद शर्माको अध्यक्षतामा १३ सदस्यीय नयाँ कार्यसमिति चयन गरिएको छ। जसको उपाध्यक्षमा निर्मल नेपाली, सचिवमा बलिनारायण रेग्मी, कोषाध्यक्षमा फुलमाया सापकोटा, उपसचिवमा भोलानाथ शर्मा र सदस्यहरु मुकुन्द गौतम, कुल बहादुर हिताङ, कल्पना थापा, सिता नेपाली, शारदा आचार्य रेग्मी, सतिश शर्मा र हरिदत्त शर्मा रहनुभएको छ।

कार्यक्रममा बोल्नु हुँदै गैसस महासंघ नेपालका निवर्तमान केन्द्रीय अध्यक्ष रामप्रसाद सुवेदीले मुलुकको विकासमा नागरिक संगठनले खेलेको भुमिका अतुलनीय भएको बताउँदै नेपालमा गैसस र नागरिक संगठनको भुमिकालाई विभिन्न बहाना र परिस्थितिले खुम्चाउन खोजिए को धारणा व्यक्त गर्नु भयो। सरकार, नागरिक संगठन र निजीक्षेत्रको त्रिपक्षीय सन्तुलन बनाउन र नागरिकका हकहित, खवरदारी र सरकारको कार्यमा साझेदारीका लागि नागरिक संगठनको अभियान अझै शसक्त बन्नु पर्ने आवश्यकता रहेको बताउनु भयो।

गैसस महासंघ नेपालका महासचिव देवी खड्काले महासंघले नेपालका समग्र नागरिक संस्थाहरुको प्रतिनिधित्व गर्दै संघसंस्था मैत्री कानुन निर्माणका लागि काम गरिरहेको बताउँदै क्षमता विकास, वकालत र पैरवीमा काम गर्ने नागरिक संगठन नागरिक संगठनले मुलुकमा अहिले बढिरहेको निराशा घटाउन समाजिक परिचालन गर्नु पर्ने कुरामा जोड दिनु भएको थियोे। उहाँले महासंघले अब स्थानिय तहहरुका नागरिक संगठनका सञ्जालहरु बनाउने र परिचालन गर्ने बताउनु भयो।

त्यस्तै फलेवास नगरपालिका प्रमुख गंगाधर तिवारीले गैससहरुको योगदानले स्थानीय सरकारको काम र कार्यप्रभावकारीता अभिवृद्धिका लागि महत्त्वपूर्ण योगदान गरिरहेको बताउनु भयो। त्यसैगरि नेकपा एमालेका अध्यक्ष गोविन्द पहाडी र नेपाली काँग्रेस पर्वतका उपसभापति डा। चुडामणि आचार्य र महाशिला गाउपालिकाका पुर्व अध्यक्ष राजुप्रसाद पौडेलले गैसस तथा नागरिक संगठनको योगदानको विगत, परिवर्तनको आन्दोलनमा खेलेको भुमिकाको बारेमा चर्चा गर्नु भएको थियो।

कार्यक्रममा कार्यक्रम गैसस महासंघ नेपाल जिल्ला शाखा पर्वतका अध्यक्ष रमेश प्रसाद रिजालको अध्यक्षता र सचिव कृष्णप्रसाद शर्माको संचालनमा भएको थियोे।त्यसैगरी नागरिक सम्मेलनले वर्ष २०८२ को लागि क्रियाशील महिला पत्रकार माया अधिकारीलाई संयोजक पदमा पदस्थापन गरेको छ। नागरिक समाज सञ्जाल पर्वतका संयोजक माधव पौडेलले अधिकारीलाइ पदस्थापन गराउनुका साथै वर्ष २०८३ का लागि संयोजकमा शिक्षाका लागि राष्ट्रिय अभियानका जिल्ला अध्यक्ष यज्ञप्रसाद शर्मा लाई चयन गरिएको घोषणा गर्नु भएको थियो। जिल्ला स्थित नागरिक संगठनका विभिन्न महासंघहरु सम्मिलित छाता परिसंघका रुपमा नागरिक समाज सञ्जाल गठन गरि गैसस महासंघले सचिवालय व्यवस्थापन गर्दै आइरहेको छ। जसको नेतृत्वमा हरेक वर्षमा परिवर्तन र पद हस्तान्तरण हुँदै जाने अभ्यास रहेको छ।

लाेक कल्याणकारी