पर्वत।रोजगारीको खोजीमा गाउँबाट युवा पलायन झनझन बढ्दो छ । सडक, बिजुली, खानेपानी, स्वास्थ्य चौकी गाउँमा पुग्र्दै गर्दा गाउँका मान्छे शहर झर्ने दर पनि बढ्दो छ । यस्तो अवस्थामा युवा पलायन र बसाई सराई रोक्न विहादी गाउँपालिकाका अध्यक्ष परविन गुरुङले भूमि बैंकको अबधारणा अघि सार्नु भएको छ । गाउँपालिका भित्र बाँझो रहेका जग्गाहरुलाई भूमि वैंकमा समेटेर रोजगारीका अवसरहरुको सृजना गर्ने अवधारणा अध्यक्ष गुरुङले अघि सार्नुभएको हो ।

गाउँपालिका अध्यक्ष गुरुङले बसाईसराईका कारण बाँझो रहेका जग्गाहरुको सदुपयोग गर्नुपर्ने अवधारणा अघि सार्दै रोजगारी बाँझो जमिन घटाई खेतीयोग्य जमिनको क्षेत्रफल विस्तार गर्ने तथा कृषकहरुको मनोबललाई उच्च राखि बाँझो जमिनको उपयोग भूमि बैंक मार्फत गरिने बताउनुभएको छ । भूमि बैंक सम्बन्धि कार्यविधि कार्यपालिकामा पेश भएको र आगामी गाउँ सभाले त्यो कार्यविधि पास गरेपछि लागू हुने उहाँले जानकारी दिनुभयो ।

बिहादी गाउँपालिका वडा नम्बर ४ वहाकीमा आयोजीत सार्वजनिक सुनुवाई कार्यक्रममा बोल्दै अध्यक्ष गुरुङले भूमि वैंक लागू भएपछि केही बर्षमा धेरै जनाले रोजगारी प्राप्त गर्ने दाबी गर्नुभयो । सही रुपमा कृषि गर्न सकेमा बिहादीको जमिनमा उत्पादन भएको अन्नले बिहादी भरी पुगेर पनि बाहिर बिक्री गर्न सकिने बताउदै भुमी बैंकको अवधारणाप्रति गाउँसभाका सबैको साथ र समर्थन हुनेमा आफु विश्वस्त रहेको पनि बताउनुभयो ।

उहाँले अवको आवश्यकता पूर्वाधार निर्माण भन्दा बढि रोजगारीको अवसर सृजना गरेर गाउँमा नै बस्ने वातावरण बनाउनु रहेको बताउनुभयो । कुकाठको बिक्री, सेनेटेरी प्याडको उत्पादन, जुत्ता, टाई तथा अन्य आयातजन्य वस्तुहरुको उत्पादन गाउँमा नै गर्न सकिने बताउँदै रोजगारीको सृजना विना गाउँमा सम्बृद्धि नआउने धारणा ब्यक्त गर्नुभयो । पुर्वाधार संगसंगै रोजगारीका कार्यक्रममा पनि ध्यान दिन र माग गर्न उहाँले आग्रह गर्नुभएको थियो ।

कार्यक्रममा वडाका स्थानीयले विकास निर्माणका बिषयमा गुनासा, सुझाव राख्नुका साथै आगामी बजेटमा समेट्नुपर्ने विषयमा धारणा राखेका थिए । वडा नम्बर ४ का अध्यक्ष बिष्णुप्रसाद भुसालको अध्यक्षतामा भएको कार्यक्रममा गाउँपालिकाका उपाध्यक्ष मिनाकुमारी शर्मा तिवारीलगायत विभिन्न राजनीतिक दलका नेता, समाजसेवी, टोल विकास समितिका पदाधिकारीलगायतको सहभागिता रहेको थियो ।

लाेक कल्याणकारी