पर्वत।प्रदेश अस्पताल पर्वतकोको व्यवस्थापन समितिमा जिल्ला समन्व्य समितिका प्रमुख विष्णुराम विक नियुक्त हुनुभएको छ ।
यस अघि राजनीतिक दलका प्रतिनिधिवाट अस्पतालको अध्यक्ष हुँदै आएकोमा गण्डकी प्रदेश सरकारले जिल्ला समन्वय समिति प्रमुख नै स्वःत अस्पताल व्यवस्थापन समितिको अध्यक्ष हुने व्यवस्था गरेपछि शनिवार विकको पदस्थापन गरिएको छ ।
गण्डकी प्रदेश सरकारका स्वास्थ्य मन्त्री कृष्ण पाठकको उपस्थितिमा विकको पदस्थापन तथा निवर्तमान अध्यक्ष शंकर गिरीलाई बिदाई गरिएको हो । अस्पताल व्यवस्थापन समितिको तीन वर्षे कार्यकाल पुरा गरेर गिरी बिदाई हुनुभएको छ । उहाँले आफ्नो कार्यकालमा अस्पताल सुधारका लागि विभिन्न ५० वटा उपलब्धि हासिल गर्न सफल भएको बताउनुभएको छ ।
अस्पतालमा पदभार ग्रहण गर्दै नवनियुक्त अध्यक्ष बिकले अस्पतालका नियमित र सफल कार्यहरुलाई निरन्तरता दिँदै जाने र कमी कमजोरीहरुलाई सुधार गर्दै लैजाने प्रतिवद्धता जनाउनुभयो । उहाँले अस्पतालमा अझै गुणस्तरीय स्वास्थ्य सेवा प्रवाह गर्नका लागि तीनै तहका सरकारबीच समन्वय गरेर अघि बढ्ने बताउनुभयो ।
कार्यक्रममा स्वास्थ्य मन्त्री पाठकले सवै अस्पतालहरुबाट नागरिकलाई सर्वसुलभ रुपमा स्वास्थ्य सेवा प्रवाह गर्नका लागि सरकारले विशेष जोड दिएको बताउनुभयो । उहाँले लामो समयदेखि स्तरोन्नती हुन नसकेका र विभिन्न समस्यामा रहेका अस्पतालहरुलाई आफ्नो कार्यकालमा सुधार गर्दै लगेको बताउनुभयो । उहाँले पर्वत अस्पताल समेत ५० शैयामा रुपान्तरण भएको बताउँदै अब सोहि अनुसारको जनशक्ति र उपकरणहरु समेत व्यवस्थापन गरिने प्रतिवद्धता जनाउनुभयो ।
कार्यक्रममा कुश्मा नगरपालिकाका नगरप्रमुख रामचन्द्र जोशी, प्रमुख जिल्ला अधिकारी हरिप्रसाद घिमीरे, निवर्तमान अध्यक्ष शंकर गिरी, ब्रम्हाकुमारी इश्वरीय विश्व विद्यालय कुश्माकी संचालिका राधिका लगायतले बोल्नुभएको थियो । पर्वत अस्पतालका मेडिकल सुपरिटन्डेन्ट डा. हेमन्त बास्तोलाको अध्यक्षतामा सम्पन्न कार्यक्रमको संचालन प्रकाश सुवेदीले गर्नुभएको थियो ।
