पर्वत । १८औँ गणतन्त्र दिवस र नेपाल प्रेस युनियनको ३४औँ स्थापना दिवसको अवसरमा “संघीय लोकतान्त्रिक गणतन्त्र: वर्तमान र भविष्य” विषयमा अन्तरसंवाद कार्यक्रम सम्पन्न भएको छ। नेपाल प्रेस युनियन पर्वत, नेपाल पत्रकार महासंघ पर्वत र विश्व प्रसाईँ वि.पी. फाउण्डेसन नेपालको संयुक्त आयोजनामा कार्यक्रम गरिएको हो।
कार्यक्रममा संविधान सभाका सदस्य अर्जुनप्रसाद जोशीले व्यवस्थामा समस्या नभई त्यसको कार्यान्वयन गर्नेको भूमिकामा कमजोरी रहेको बताए। नेपाली काँग्रेस पर्वतका उपसभापति शिवप्रसाद सुवेदीले गणतन्त्र ल्याउन ठूलो मूल्य चुकाइएको भए पनि अपेक्षित विकास नभएकोमा चिन्ता व्यक्त गरे। माओवादी केन्द्रका नेता शंकर गिरी र गोपी अधिकारीले गणतन्त्रको जग आन्दोलनले तयार पारेको उल्लेख गर्दै नेतृत्वप्रति प्रश्न उठाए।
कार्यक्रममा सहभागी विभिन्न क्षेत्रका व्यक्तिहरुले गणतन्त्रको विकल्प नरहेको भए पनि राजनीतिक दलहरुको व्यवहारले जनतामा निराशा बढेको धारणा राखे। विश्व प्रसाई वि.पी. फाउण्डेसनका अध्यक्ष विश्व प्रकाश प्रसाईँले गणतन्त्रको सुधार आवश्यक रहेको बताए।
कार्यक्रमको अध्यक्षताविश्व प्रकाश प्रसाईँले गर्नु भएको थियो भने स्वागत मन्तव्य नेपाल पत्रकार महासंघ पर्वत अध्यक्ष लक्ष्मण सापकोटाले गर्नु भएको थियो ।
