पर्वत। आज अन्तराष्ट्रिय क्षयरोग दिवस । नेपालमा पनि ‘हो, हामी क्षयरोग अन्त्य गर्न सक्छौं । लगानीको प्रतिबद्धता र सेवा प्रवाहको सुनिश्चतता, आजको आवश्यकता’ भन्ने मुख्य नारालाई आत्मसाथ गर्दै विभिन्न कार्यक्रम गरी मनाइदैछ । पर्वतमा पनि विभिन्न स्थानीय तहले समुदाय स्तरमा यो दिवस विविध कार्यक्रमका साथ मनाइरहेका छन् ।
पछिल्लो तथ्याङ्क अनुसार पर्वत जिल्लामा ४१ जना क्षयरोगका विरामीहरु पत्ता लागेका छन् । प्रदेश जनस्वास्थ्य कार्यालय पर्वतका क्षयरोग फोकलपर्सन नारायण रेग्मीका अनुसार पर्वतमा ६५ बर्ष उमेर समुह माथिका ४१ जनामा क्षयरोग देखिएको र नियमित औषधी सेवन गरिरहेको बताउनुभयो । विरामीको प्रकृति अनुसार न्यूनतम ६ महिना सम्म नछुटाइ औषधी सेवन गरेमा क्षयरोग निको हुन्छ । पर्वतका सात स्थानीय तह मध्ये सवै भन्दा धेरै १६ जना पैयु गाउँपालिकामा क्षयरोगका विरामी भेटिएका छन् । यही अवस्थालाई मध्य नजर गर्दै कार्यालयले पैयु गाउँपालिकाको समन्वयमा स्थानीय स्तरमा क्षयरोग सम्बन्धि निशुल्क स्क्रिनिङ शिविर सञ्चालन गरेको छ ।
रेग्मीका अनुसार रोग पत्ता लागेका विरामीहरु नियमित रुपमा स्वास्थ्य संस्थाबाट औषधी सेवन गरिरहेको भएपनि कतिपय विरामीहरु विविध कारण देखाएर परीक्षण गर्न नमान्ने र रोग लुकाएर बस्ने अवस्थाले गर्दा समस्या उत्पन्न भएको छ । उहाँले रोग पत्ता लगाउन र निवारणको चरणमा पुर्याउनका लागि प्रदेश जनस्वास्थ्य कार्यालय पर्वतले विभिन्न सामुदायिक सचेतना तथा स्क्रिनिङ शिविरहरु सञ्चालन गर्दै आएको बताउनुभयो । पैयु गाउँपालिकाले क्षयरोगका विरामीलाई नियमित औषधी उपचार सँगै मासिक १ हजारका दरले ६ महिना सम्म पोषण भत्ता दिने गरेको पैयू स्वास्थ्य शाखा प्रमुख देवीप्रसाद भुर्तेलले बताउनुभयो ।
जनस्वास्थ्य कार्यालय पर्वतले दिएको तथ्याङ्क अनुसार अघिल्लो बर्षको तुलनामा यो बर्ष क्षयरोगका विरामीको संख्यामा कमी भएको देखिन्छ । आर्थिक बर्ष २०८०।८१ मा ७२ जना क्षयरोगका विरामी पत्ता लागेका थिए भने यो बर्षको चैत्र सम्म ४१ जना विरामीहरु भेटिएका हुन् । विरामीको संख्या घट्नुको कारण परीक्षण कम भएर पनि हुन सक्ने भन्दै जनस्वास्थ्य कार्यालय पर्वतले विभिन्न स्थानीय तह सँग समन्वय गरी परीक्षणको दायरा बढाउन अनुरोध गरिएको कार्यालयका प्रमुख बद्रीराज आचार्यले बताउनुभयो ।
