पर्वत । पर्वत जिल्लाको कुश्मा नगरपालिकामा सार्वजनिक जंगलमा आगो लगाउने कार्यमा संलग्न दुई जनालाई प्रहरीले पक्राउ गरेको छ ।

२०८१ साल चैत ६ गते बेलुका करिब ५ बजे पर्वतको कुश्मा नगरपालिका–७ खहरिया स्थित भिरमा डढेलो लागेको सूचना पाएपछि प्रहरी निरीक्षक राम प्रसाद सापकोटाको नेतृत्वमा प्रहरी टोली खटिएको थियो। उक्त टोलीले मानव बस्तीलाई सुरक्षित राख्दै आगलागी नियन्त्रणमा लिन सफल भयो।

त्यसै दिन बेलुका ६ बजे कुश्मा नगरपालिका–१० ज्ञादीस्थित मोदी खोला माथिको सार्वजनिक जंगलमा आगो लगाइरहेको अवस्थामा प्रहरी टोलीले कुश्मा–९ बस्ने १८ वर्षीय समिर थापा र १७ वर्षीय एक नाबालकलाई नियन्त्रणमा लिएको छ। पक्राउ परेका दुबैजनालाई थप अनुसन्धानका लागि डिभिजन बन कार्यालय, कुश्मा पर्वत पठाइएको छ।

पक्राउ परेकामध्ये एक जना १७ वर्षीय नाबालक रहेकाले निजको नाम, थर, फोटो तथा अन्य व्यक्तिगत विवरण गोप्य राख्न अनुरोध गरिएको छ।
प्रहरीले बन तथा वातावरण सुरक्षाका लागि सबै नागरिकलाई सचेत रहन आग्रह गर्दै सार्वजनिक बन क्षेत्रमा आगलागी गर्ने कार्य आपराधिक हुने जनाएको छ। दोषी पाइएमा कानूनी कारबाही गरिने चेतावनी समेत दिएको छ।

लाेक कल्याणकारी