प्रनिश गिरी,पर्वत । गण्डकी प्रदेशमा पर्ने भौगोलिक रुपमा सानो पहाडी जिल्ला पर्वत पछिल्लो एक दशकदेखि पर्यटकीय गन्तव्यको रुपमा चिनिएको छ । पर्वतलाई गन्तव्य बनाएर घुम्न आउने आन्तरिक तथा बाह्य पर्यटकलाई यहाँका आर्थिक, धार्मिक, सामाजिक, सांस्कृतिक लगायतका पक्षबारे जानकारी गराउने व्यवस्थित पर्यटन सुचना केन्द्र छैन ।

पर्यटन तथा उद्योग कार्यालय पर्वतका अनुसार पर्यटन सुुचना केन्द्रको अभावमा जिल्ला भित्रिने आन्तरिक तथा बाह्रय पर्यटक संख्याको आधिकारीक तथ्यांक छैन । पर्यटन कार्यालयका प्रमुख पोषनाथ शर्माले मुलुककै पर्यटकीय गन्तव्य मानिएको पर्वतमा पर्यटन सुचना केन्द्र अति नै आवश्यक रहेको बताउँदै भन्नुभयो–पर्वतको पर्यटन विकासका लागि तयार पारिने पर्यटन नीति, योजना र कार्यक्रमका लागि सुचना केन्द्र आवश्यक छ । सुचना केन्द्रको अभावमा पर्यटक आगमनको तथ्यांक पनि राख्न सकिएको छैन ।

पर्यटन प्रवद्र्धन कार्यक्रम गर्नका लागि आवश्यक आर्थिक बजेट समेत छैन ।यस जिल्लाको पर्यटन प्रवद्र्धनसँगै आर्थिक, सामाजि, सांस्कृति र भौतिक सम्वृद्धि गर्नका लागि पर्यटन सुचना केन्द्रको अभाव छ । दशकौ पहिलेदेखि सरोकारवाला पक्ष विच पर्यटन सुचना केन्द्रको आवश्यकताबारे छलफल भए पनि स्थापना भएको छैन ।

तत्कालिन जिल्ला विकास समितिले पर्वतको पर्यटन प्रवद्र्धन बारे २०७२ सालमा पर्वत विकास गुरुयोजना पुस्तक तयार पारेको थियो । गुरुयोजनामा पर्यटन प्रवद्र्धनका लागि योजना निर्माण अन्तर्गत पर्यटन सुचना केन्द्रको स्थापना र संचालनको आवश्यकता औल्याइएको छ । पर्वतको पर्यटनसँग सम्वन्धित रही लेखिएका विभिन्न पुस्तक र कार्यपत्रहरुमा समेत पर्यटन सुचना केन्द्रको महत्व उल्लेख छ ।

पर्वत पर्यटन प्रवद्र्धन केन्द्रको अध्यक्ष शिव प्रसाद शर्माका अनुसार कुश्मा नगरपालिका ६ मा रहेको सामुदायिक प्रहरी सेवा केन्द्र रहेको भवनको माथिल्लो तलामा कुश्मा नगरपालिकाको आर्थिक सहयोगमा आधुनिक प्रविधियुक्त पर्यटन सुचना केन्द्र स्थापना गरी संचालन गर्न खोजिएको थियो । अति आवश्यक हुँदै पनि आर्थिक अभावकै कारण केन्द्र स्थापना र संचालन गर्न सकिएन ।

लाेक कल्याणकारी