प्रनिश गिरी,कुश्मा। पर्वतको प्रादेशिक अस्पताल कुश्मामा अत्याधुनिक सुविधा सहितको पोस्टमार्टम गृह निर्माण हुने भएको छ। वर्षौं पहिले निर्माण भएको पारम्परिक पोस्टमार्टम गृह जीर्ण भएपछि अस्पतालले आधुनिक प्रविधि र सुविधा सहितको पोस्टमार्टम गृह निर्माण गर्ने भएको हो।
पोस्टमार्टम गृह निर्माणको कुल लागत ५७ लाख रुपियाँ रहेको छ। यसमा गण्डकी प्रदेशको स्वास्थ्य मन्त्रालयले ४० लाख रुपियाँ सहयोग गरेको छ भने अस्पताल व्यवस्थापन समितिले १७ लाख उपलब्ध गराउने छ। मानिसको बाक्लो बस्ती रहेसँगै जीर्ण बनेको पोस्टमार्टम गृहलाई स्थानीय बासिन्दाले व्यवस्थित बनाउन आग्रह गर्दै आएका थिए।
पोस्टमार्टम गृह पुरानो भएको र आधुनिक मर्चरी च्याम्बर नहुँदा शवलाई केही समय बढी राख्दा दुर्गन्ध फैलिएको स्थानीयवासीले गुनासो गर्दै आएका छन्। अस्पतालको निमित्त प्रमुख डाक्टर मिलन अवालेले पोस्टमार्टम जीर्ण र साँगुरो हुँदा काम गर्न पनि कठिनाइ भएको बताउनुभयो।
स्थानीयवासीको माग र अस्पतालको आवश्यकता अनुसार अत्याधुनिक पोस्टमार्टम गृहको निर्माण हुन लागेको बताउँदै अस्पताल व्यवस्थापन समितिका अध्यक्ष शंकर गिरीले बताउनुभयो। अत्याधुनिक पोस्टमार्टम गृहले वैज्ञानिक अनुसन्धान, कानुनी प्रक्रिया तथा चिकित्सा अध्ययनलाई प्रभावकारी बनाउने कार्य गर्छ।
अस्पतालका मेडिकल रेकर्डर प्रकाश सुवेदीका अनुसार अस्पतालमा पोस्टमार्टमका लागि ल्याइने शवको सङ्ख्या बसेर्नी बढ्दो रहेको छ। गत वर्ष ६२ वटा शव पोस्टमार्टमका लागि ल्याइएको थियो।
पोस्टमार्टम भवनको ब्रम्हकुमारी ईश्वरीय विश्वविद्यालय कुश्माकी प्रमुख राधिका दिदी, मुश्लिम समाज पर्वतका अध्यक्ष जलालुदिन मिया र स्थानीय सामाजिक अगुवा देवीप्रसाद विलासीले संयुक्त रूपमा शिलान्यास गर्नुभएको हो।
