पर्वत। यही फागुन २४ गते मनाउन लागिएको एक सय पन्ध्रौँ अन्तर्राष्ट्रिय नारी दिवसको अवसर पारेर महिलाहरूको बिचमा वक्तृत्व कला प्रतियोगिता सम्पन्न भएको छ ।
कुश्माको कृष्ण गण्डकी सामुदायिक सिकाइ केन्द्रको आयोजनामा ‘सबै महिला तथा बालबालिकाको लागि अधिकार, समानता र सशक्तीकरण’ शीर्षकमा प्रतियोगिताको आयोजना गरिएको हो । यस्ता प्रतियोगिताहरू विद्यालयमा धेरै नै हुने गरेकोले केही फरक गर्नका लागि प्रौढ महिलाहरूको बिचमा प्रतियोगिताको आयोजना गरिएको सिकाइ केन्द्रका अध्यक्ष एकनारायण चालिसेले बताए ।
प्रतियोगितामा धौलागिरि आमा समूहकी सविता लामिछाने प्रथम, दक्षिणकाली आमा समूहकी महाकाली अधिकारी पौडेल द्वितीय, सहनशीलता महिला विकास समूहकी स्वेच्छा आचार्य तृतीय र इनरह्वील क्लब अफ पर्वतकी मिना जोशी सान्त्वना स्थानमा आएका छन् । उनीहरूले पुरस्कार स्वरूप क्रमशः पाँच हजार, चार हजार, तीन हजार र दुई हजार रुपैयाँ सहित प्रमाणपत्र पाउने छन् । यो पुरस्कार दिवसको अवसरमा आयोजना मूल समारोहमा प्रदान गर्ने तय भएको छ ।
सो अवसरमा बोल्दै उनले महिला र बालबालिका कुनै पनि समाजका आधार स्तम्भ भएकोले उनीहरूको सशक्तीकरण बिना समाजको प्रगति अपूर्ण रहने बताए । तर, आज पनि संसारभरि धेरै महिला तथा बालबालिका आफ्नो आधारभूत अधिकारबाट वञ्चित हुनु दुःखद रहेको उनको भनाइ छ । शिक्षा, स्वास्थ्य, रोजगारी, निर्णय प्रक्रियामा सहभागिता जस्ता महत्त्वपूर्ण क्षेत्रमा उनीहरूलाई पछि पारिँदा राज्य नै कमजोर हुने भएकोले महिला तथा बालबालिकाका लागि समान अवसर सिर्जना गर्नुपर्ने शाखा प्रमुख तिवारीले बताए ।
सिकाइ केन्द्रका अध्यक्ष एकनारायण चालिसेको अध्यक्षतामा भएको कार्यक्रमको सञ्चालन केन्द्रकी कोषाध्यक्ष गङ्गा शर्माले गरेकी थिइन् । उक्त प्रतियोगिताको निर्णायकको रूपमा कुश्मा नगरपालिकाका शिक्षा अधिकृत दीपक सुवेदी, केन्द्रका सल्लाहकार सदस्य तथा साहित्यकार राजेन्द्र पहाडी र नारायण माध्यमिक विद्यालय कुश्माका पूर्व प्रधानाध्यापक पृथ्वीनारायण शर्मा रहेका थिए । प्रतियोगितामा १० जना महिलाहरूले प्रतिस्पर्धा गरेका थिए ।
