पर्वत । जिल्ला प्रहरी कार्यालयसंगको समन्वयमा कुश्मा नगरपालिकाले विद्यार्थीहरु माझ लागू पदार्थ दुब्यर्सनी न्यूनिकरण कार्यक्रम सञ्चालन शुरु गरेको छ । नगरभित्रका बजार क्षेत्रहरुमा लागू पदार्थ दुब्र्यसनीको संख्या बढ्दै गएपछि नगरपालिकाले यसको रोकथामका लागि अभियान सञ्चालन गरेको हो ।
नगरपालिकाले कुश्मा बजारका विभिन्न विद्यालयहरुमा रहेका कक्षा ६ देखि १० सम्मका विद्यार्थीहरुलाई लक्षित गरी लागू पदार्थ दुब्र्यसनी न्यूनिकरणका लागि अभिमुखीकरण कार्यक्रमको शुरुवात गरेको हो । अभियान अन्तर्गत विहिबार सदरमुकाम स्थित शिवालय माध्यमिक विद्यालय र नारायण माध्यमिक विद्यालयका विद्यार्थीहरुका लागि अभिमुखीकरण कार्यक्रमको सञ्चालन गरिएको थियो ।
कार्यक्रममा जिल्ला प्रहरी कार्यालय पर्वतका प्रहरी निरिक्षक निरबहादुर बाँनियाले सहजीकरण गरेका थिए । बाँनियाले विद्यार्थीहरुलाई लागू पदार्थ दुब्यर्सनी नलाग्न अनुरोध गर्दै लागू पदार्थ दुब्र्यसनीले स्वास्थ्यमा पार्ने प्रभावका विषयमा विषयकेन्द्रित छलफल सञ्चालन गरेका थिए ।
शिवालय माध्यमिक विद्यालयका ब्यवस्थापन समितिका अध्यक्ष भविन्द्र गिरीको अध्यक्षतामा सम्पन्न कार्यक्रमा नगर शिक्षा अधिकृत दिपक सुवेदीले विद्यार्थीहरु नै लागू पदार्थ दुब्यर्सनीमा फस्दै जाँदा त्यसले समग्र क्षेत्रमा असर गर्ने धारणा राखे । नारायण माविमा सञ्चालीत कार्यक्रममा विद्यालयका प्रअ प्रकाश रिजालको अध्यक्षतामा कार्यक्रम सम्पन्न भएको थियो । सोहि अवसरमा शिक्षा अधिकृत सुवेदीले पछिल्लो समय किशोरावस्थाको उमेर देखि नै लागू पदार्थ दुब्र्यसनमा विद्यार्थीहरु लाग्ने गरेको भन्दै यस्तो कुलत कार्यमा नलाग्न विद्यार्थीहरुलाई आग्रह गरे । पत्रकार महासंघका केन्द्रिय सदस्य छविलाल तिवारीले विद्यार्थीहरु देशको भविश्य भएकाले कुलत कार्यमा नलाग्न आग्रह गरेका थिए । अभिमुखीकरण कार्यक्रमको सञ्चालन पत्रकार गणेश गिरीले गरेका थिए ।
नगरपालिका नगर भित्रका विभिन्न विद्यालयलाई केन्द्रित गरी लागू पदार्थ दुब्यर्सन न्यूनिकरण सम्बन्धि कार्यक्रम सञ्चालन गरीरहेको छ । विद्यालय केन्द्रित अभियानबाट विद्यार्थीहरुमा सचेतना अभिबृद्धि हुने नगर प्रमुख रामचन्द्र जोशीले विश्वास ब्यक्त गरेका छन् । प्रमुख प्रशासकीय अधिकृत नेत्र पौडेलले कलिलो उमेरमा लागू पदार्थ दुब्यर्सनीमा फस्दै जाँदा त्यसले ब्यक्तिको भविश्व अध्यारो हुने भन्दै यस्ता कुलत कार्यमा लाग्नबाट रोक्ने विद्यार्थी स्वयम्, अभिभावक र शिक्षक समेत सचेत रहनुपर्ने धारणा राख्छन् ।
