शिशिर, पोखरा। आफुलाई शिक्षा प्रदान गरेका गुरुहरुको स्मृतिमा पोखराको बाटुलेचौरस्थित विन्ध्यवासिनी माविमा अक्षयकोष स्थापना गरिएको छ । सोही विद्यालयवाट वि.सं. २०३८ सालमा प्रवेशिका परिक्षामा सहभागी भएका विद्यार्थीको समुहले तत्कालिन विद्यालयका प्रधानाध्यापक स्वर्गीय देवेन्द्रराज रेग्मी र भगवानसिंह आलेको स्मृतिमा १ लाख ३० हजार रुपियाँको “देवेन्द्र–भगवान स्मृति एसएलसी व्याच २०३८ अक्षयकोष” स्थापना गरिएको सो समुहको नेतृत्व गर्नुभएका राम वहादुर बानियाँले जानकारी दिनुभयो । विद्यालयमा आयोजित कार्यक्रममा सो रकम बराबरको चेक समुहका राम वहादुर बानियाँ, हरि वरुवाल, केशव वहादुर वस्नेत लगायतले विद्यालयका प्रधानाध्यापक कृष्ण प्रसाद आचार्यलाई हस्तान्तरण गर्नुभयो ।

सो रकमवाट प्राप्त व्याजले कक्षा ६ मा अध्ययन गर्ने उत्कृष्ट गरिव तथा जेहेन्दार विद्यार्थीलाई नगद ६ हजार रुपैयाँ, दश कक्षामा पढिन्जेलसम्म निरन्तर प्रदान गरिने वताईएको छ । कार्यक्रममा बाँनियाले शिक्षाको ज्योति प्रदान गर्ने गुरुहरुको योगदानलाई चीर स्थायी बनाउन र आफु अध्ययन गरेको विद्यालयलाई जहाँ भए पनि स्मरण गर्नुपर्छ भन्ने आर्दशलाई मनन गरी रकम संकलन गरेर अक्षयकोष स्थापना गरेको बताउनु भयो । विद्यालयका प्रधानाध्यापक आचार्यले २०३८ को व्याचले गरेको कार्य प्रसंशनिय रहेको बताउँदै, यसले गुरुहरु प्रति सच्चा सम्मान् भएको स्मरण गर्नुभयो ।

कोष स्थापनाका लागि तत्कालिन व्याचका विद्यार्थीवाट नगद संकलन गरिएको थियो । कोषलाई भविष्यमा २ लाखसम्म बनाईने बताईएको छ ।

लाेक कल्याणकारी